Производственнай үөрэтии маастара Мария Неустроева кылтан норуодунай суруйааччы Леонид Попов мэтириэтин оҥордо.
Кини бэйэтэ толкуйдаан, ураты технологиянан оҥорбут. Ол курдук кылы, сиэли бытархай гына кырыйан, нарылаан, өҥүн дьүөрэлээн баран, уруһуй үрдүнэн килиэйгэ түһэрбит. Манна хатайдааһын («валяние») ньымата эмиэ туттуллубут. Мэтириэт А3 лиис саҕа кээмэйдээх. Ыраахтан көрдөххө, Леонид Андреевич үүт-үкчү көрөн олорор.
Мария Николаевна Сунтаар улууһун Л.А. Попов аатынан Арыылаах орто оскуолатыгар оҕолору иискэ-ууска үөрэтэр. Кини бэйэтэ сиэлинэн өрөр, араас оҥоһуктары, сэлээппэлэри, киэргэллэри оҥорор, иистэнэр, быыстапкаларга кыттар, маастар-кылаастары ыытар. Кини сатаабатаҕа суох, нэһилиэгин дьонугар урут-уруккуттан баттах да кырыйар, сакааска иистэнэр да.
Маастар этэринэн, бу үлэтин кэлэ-бара сылдьан, үлэтин, дьиэтин түбүгүн быыһыгар биир нэдиэлэ устата оҥорбут. Биир сиргэ олорон, илиитин араарбакка оҥорбута буоллар, биир күнүнэн бүтэриэхтээҕэ эбитэ үһү.
2019 сылга Леонид Попов төрөөбүтэ 100 сылын туолуохтаах. Суруйааччы төрөөбүт нэһилиэгэр онно бэлэмнэнии үлэтэ ыытыллар.
Ангелина ВАСИЛЬЕВА, “Саха сирэ” хаһыат, edersaas.ru