Кылгас кэм иһигэр ууга барбыт сэлиэнньэлэри чөлүгэр түһэрэр соруктаахтар
Ааспыт нэдиэлэҕэ Ил Дархан Айсен Николаев РФ бэрэсидьиэнин Уһук Илин уоукуругун боломуочуйалаах бэрэстэбиитэлэ Юрий Трутневы кытта ууга барбыт Дьааҥы улууһугар баран, олохтоохтору кытта көрсөн балаһыанньаны билсэн кэлбиттэрэ.
“Өрөспүүбүлүкэтээҕи, улуустааҕы суһал ыстааптар табыллан үлэлээбиттэрин түмүгэр, Баатаҕайы өрүһүйүүгэ туруммут хорсун дьон баар буолан улахан алдьархай тахсыаҕын – улуус киинэ ууга барыаҕын эрдэттэн туораттыбыт. Хомойуох иһин, атын нэһилиэнньэлээх пууннар, ол иһигэр Верхоянскай куорат ууга бардылар”, — диэн Ил Дархан Айсен Николаев иһитиннэрдэ.
Олохтоохтору кытта көрсөн этиилэрин, санааларын истибиттэрэ. Сарсыҥҥы күнүгэр Дьокуускайга кэккэ федеральнай министиэристибэлэр салайааччылара кыттыылаах куйаар ситиминэн улахан мунньах буолбута. Сүрүннээн Дьааҥы улууһа ууга барыытын чөлүгэр түһэрии, ону таһынан, ойуур баһаарын тула кэпсэтии буолбута.
“Арассыыйа ЫБММ быһаарыытынан, Саха сиригэр саамай улахан Ми-8 бөртөлүөт үлэлиир. Бастатан туран, улууска, эмсэҕэлээбит нэһилиэктэргэ гуманитарнай таһаҕаһы тиэйиигэ туһаныллар. Бырабыыталыстыба биэдэмистибэлэр икки ардыларынааҕы хоромньуну ааҕар бөлөҕө үлэтин түмүктээн эрэр, дьон испииһэгин оҥороллор. 4000-тан тахса сайабылыанньа киирдэ. Биир киһи хас даҕаны сайабылыанньаны биэриэн сөп. Быһаарыы ылыллаатын кытта дьоҥҥо көмө оҥоһуллубутунан барыаҕа. Өрөспүүбүлүкэ бырабыыталыстыбата нэһилиэнньэҕэ көмөлөһөр соруктаах 30 мөл. солк. сууманы улууска номнуо ыыппыта. Ону тэҥэ, Үлэ уонна социальнай сайдыы министиэристибэтэ 3 мөл. солк. кэриҥэ сууманы кыра дохуоттаах дьоҥҥо, ыалга көмөлөһөр соруктаах ыыппыта”, — диэн Айсен Сергеевич иһитиннэрдэ.
Ил Дархан Дьааҥы улууһуттан элбэх оҕо кэлэн Дьокуускай куорат лааҕырдарыгар сынньанарын, бу үлэ салгыы барыаҕын эттэ.
“Биһиги билигин бэрт түргэнник олорор дьиэлэри, социальнай инфраструктураны, суолу чөлүгэр түһэрэр итиэннэ оттук сезонугар бэлэмниир соруктаахпыт. Бу эмсэҕэлээбит сэлинньэлэргэ оттук кэмэ эрдэ саҕаланар”, — диэн быһа сибээс кэмигэр бэлиэтээтэ.
“Саха сирэ” хаһыат, edersaas.ru