Кылаас салайааччылара балаҕан ыйынааҕы эбии төлөбүрү Учуутал күнүгэр диэри ылыахтара

Балаҕан ыйынааҕы эбии төлөбүрү Учуутал күнүгэр диэри 800 тыһыынчаттан тахса кылаас салайааччыта ылыаҕа. Ити туһунан дойду бэрэсидьиэнэ Владимир Путин бырабыыталыстыба чилиэннэрин кытта ыыппыт мунньаҕар РФ үөрэҕириигэ миниистирэ Сергей Кравцов иһитиннэрдэ диэн ТАСС суруйар.

“Балаҕан ыйыттан кылаас салайааччыларыгар эбии төлөбүрү көрүү туһунан сорудаҕыҥ харгыһа суох олоххо киирэр. Сөптөөх үп көрүллүбүтэ. Кылаас бары салайааччылара – 800 тыһыынчаттан тахса киһи балаҕан ыйынааҕы төлөбүрү, сыллата алтынньы 5 күнүгэр бэлиэтэнэр, Учуутал күнүгэр диэри ылыахтара”, — диэн эттэ.

Биэдэмэстибэ, бу боппуруоһу Федерация Сэбиэтин, Нолуок федеральнай сулууспатын уонна дойду казначействотын кытта хонтуруолга тутар диэн РФ үөрэҕириигэ миниистирэ бэлиэтээн эттэ. “Бүгүҥҥүтэ биһиги хас биирдии оскуола, хас биирдии кылаас салайааччытын балаһыанньатын чуолкайдык көрөбүт. Хайдах тэриллэн эрэрин учууталлар бэйэлэрэ иһитиннэрэллэрин туһугар министиэристибэҕэ “быһа линия” үлэлиир”, — диэн Кравцов чопчулаата.

Кылаас салайааччыларыгар көрүллэр төлөбүр атын төлөбүрдэртэн туспа төлөнөрүгэр болҕомтону уурда. “Бу учууталлар интэриэстэрин көмүскүүргэ көмөлөһүөҕэ, эрдэттэн көрүллэр төлөбүр – икки кылааһы салайыы, хотугу, эрэгийиэннээҕи намтаабатын ситиһии”, — диэн миниистир иһитиннэрдэ.

СӨ официальнай информационнай порталытта.