“Үөрэнээччилэргэ саамай чугас киһи – кылаас салайааччыта. Онон сибээстээн, балаҕан ыйын 1 күнүттэн кылаас салайааччыларыгар федеральнай хааһынаттан 5000 солкуобайтан итэҕэһэ суох анал эбии төлөбүрү көрөр ирдэнэр”, — диэн дойду бэрэсидьиэнэ аҕыйах хонуктааҕыта эппитэ. Ону ааһан, кылаас салайааччыларыгар эрэгийиэнтэн көрүллэр төлөбүр оннунан хаалыахтаах диэн чорботон бэлиэтээбитэ.
“Саха сирэ” хаһыат, edersaas.ru
Саха сирин үөрэҕин үлэһиттэрин тохсунньутааҕы мунньаҕын кэмигэр, суруналыыстар бу туһунан туоһалыспыттарыгар СӨ үөрэҕин уонна наукатын миниистирэ Владимир Егоров: “Кылаас салайааччыларыгар күн бүгүн 900-4500 солкуобайга диэри төлөбүр оҥоһуллар. Дойду бэрэсидьиэнэ эппитинэн, билиҥҥи төлөбүрү оннунан хаалларыахтаахпыт, ону таһынан, федеральнай хааһынаттан хас биирдии кылаас салайааччыгар 5-тии тыһыынча солкуобай кэлиэхтээх. Холобур, 2014 сылга диэри 1 тыһыынча солкуобай федеральнай бюджеттан көрүллэр этэ”, — диэн быһаарда. Билигин РФ Үөрэҕириигэ министиэристибэтэ эрэгийиэннэртэн хас оҕо үөрэнэрин, хас кылаас салайааччыта баарын, төһө харчы төлөнөрүн туһунан сыыппаралары хомуйар. Бэрэсидьиэн ыйыытынан, эбии төлөбүр аны күһүн үөрэх дьыла саҕаланыытыттан бэриллиэхтээх.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриитэ.