Кылаас салайааччытыгар эбии төлөбүр пандемия даҕаны кэнниттэн көрүллүөҕэ
Дойду бэрэсидьиэнин сорудаҕынан быйыл, балаҕан ыйыттан, кылаас салайааччыларыгар 5-тии тыһыынча солкуобай көрүллэр. Маныаха үбүлээһин дойду бүддьүөтүттэн кэлэр.
СӨ Бырабыыталыстыбатын бэрэссэдээтэлин солбуйааччы Сергей Местников: “Кылаас салайааччыларыгар эбии төлөбүр Арассыыйа ыытар уопсай бэлиитикэтэ. Кылаас салайааччыларыгар төлөбүр пандемия кэмигэр эрэ буолбакка, инникитин даҕаны салҕанан барыаҕа”, — диэн “Саха” НКИХ “Талбан” биэриитин кэмигэр эттэ.
“Дойду хааһынатыттан көрүллэр үбүлээһиҥҥэ, биһиги эрэгийиэммит эмиэ бэйэтэ харчы укпута. Кылаас салайааччыта ханнык улууска (куорат таһынааҕы дуу, Арктика улууһа дуу…) үлэлиириттэн көрөн, коэффициент эбиллэн, 8-9 тыһыынчаҕа тиийэ улаатта. Онон биһиги эрэгийиэммит кылаас салайааччыларыгар эбии үбү уган олорор”, – диэн СӨ Үөрэҕин уонна наукатын миниистирин бастакы солбуйааччы Ирина Любимова иһитиннэрдэ. Ону тэҥэ, хамнас төлөбүрүгэр балаһыанньалар (эбии коэффициент, көҕүлүүр пуонда…) баалларын, онон оскуола салайар сэбиэтэ учууталлар хайдах үлэлииллэрин көрөн, эбии төлөбүр оҥоруохтарын сөп диэн быһаарда.
Людмила ПОПОВА, “Саха сирэ” хаһыат, edersaas.ru
Хаартыска: Мария ВАСИЛЬЕВА (СИА).