Үөһээ Бүлүү улууһугар кылаас салайааччылара эбии 10 320 солкуобайы ылыахтара
Балаҕан ыйыттан кылаас салайааччыларыгар 5000 солкуобай эбии төлөбүр көрүллэр. Бу күннэргэ учууталларга ити төлөбүр түһэн эрэр.
РФ бэрэсидьиэнэ Владимир Путин сорудаҕынан, дойду хааһынатыттан кылаас салайааччыларыгар барыларыгар 5-тии тыһыынча солкуобай көрүллүөхтээх. Бу, эрдэ ыла сылдьыбыт эрэгийиэннээҕи төлөбүрү таһынан көрүллэр харчы буолар.
Үөһээ Бүлүүтээҕи үөрэх управлениетын начаалынньыга Спиридон Борбуев иһитиннэрэринэн, улууска тустаах төлөбүрү 281 кылаас салайааччыта ылар эбит. “Кэлбит 2020-2021 үөрэх дьыла федеральнай таһымтан күүстээх өйөбүлүнэн саҕаланна. Ол курдук, алын кылаас үөрэнээччилэрэ бары босхо аһылыгынан хааччыллар буоллулар. Ону таһынан, бу күннэргэ улуус оскуолаларын бары кылаас салайааччылара оҕону иитиигэ, кылааһы түмэр үлэлэрин иһин дойду салайааччыта Владимир Путин уурааҕынан көрүллэр эбии төлөбүрдэрин ылыахтара. Этиллибит 5000 солкуобайга хоту уонна тыа сиригэр олорорбутунан, эбиилэрин киллэрэн туран, 12000 солкуобай көрүлүннэ. Нолуоктарын уонна профсойуустарын усунуоһун көҕүрэтэн туран, хас биирдии 281 кылаас салайааччыта илиитигэр 10 320 солкуобайы тутуоҕа. Балаҕан ыйдааҕы төлөбүр оскуолаларга барда”, — диэн санаатын үллэстэр.
Санатан эттэххэ, дойду үрдүнэн эбии төлөбүрү 838 тыһыынча, Саха сиригэр 9142 учуутал ылыахтаах.
Людмила ПОПОВА, “Саха сирэ” хаһыат, edersaas.ru