СӨ үөрэҕин уонна наукатын миниистирэ Михаил Сивцев социальнай ситимнэринэн быһа сибээскэ хоруйдуур кэмигэр, кылаас салайааччыларыгар көрүллэр эбии төлөбүр туһунан ыйыталастылар.
“Дойду бэрэсидьиэнин анал этиитигэр олоҕуран, балаҕан ыйын 1 күнүттэн кылаас салайааччыларыгар 5000 солкуобай эбии төлөбүр көрүллэр. Бу төлөбүр индексацияланар. Манна оройуон коэффициена уонна хотугу надбавка эбиллэр. Онон кылаас салайааччыларыгар балачча үчүгэй төлөбүр көрүллэр. Холобура, бу иннинэ модельнай ньыманан (методика) алын кылаас учууталлара 2300 солкуобайы ыла сылдьыбыт эбит буоллахтарына, балаҕан ыйын 1 күнүттэн өйөбүл саҥа миэрэтинэн бу кылаас салайааччылара 14 800 солкуобайы ылар буолуохтара. Бу учуутал хотугу эргимтэҕэ диэри дуу, хотугу эргимтэ таһыгар дуу, үлэлиириттэн итиэннэ үөрэх тэрилтэтэ туттар ньыматыттан (методика) тутулуктаах”, — диэн миниистир хоруйдаата.
Санатан эттэххэ, Саха сиригэр эбии төлөбүрү 9179 учуутал ылыаҕа.
Людмила ПОПОВА, “Саха сирэ” хаһыат, edersaas.ru