Саҥа дьылбыт сахсаана ааһан, аны быыбарынан итиэннэ харантыынынан эрэ олоробут. Айа, быыбартан хал да буолан бардым. Бары “кирдэрин-хохторун” барытын хостоһон эрэллэр. Дьэ дьаабы. Аны, былыр, биһиги оҕо эрдэхпитинэ оскуола харантыыҥҥа сабыллар үһү диэни букатын истибэт этим. Эчи, ыарыыбыт да арааһа элбэҕэ сөхтөрөр эрэ.
edersaas.ru
Үнүр күөрчэх үүтүн аҕала таарыйа кыыһым кэлэн барда. Итиэннэ сорох кылаастары харантыыҥҥа ыыппыттарын, биһиэннэрэ иккиэн атын-атын оскуолаҕа үөрэнэр эрээри, харантыын хайаларыгар да биллэриллибэтэҕин кэпсээтэ. Былырыыҥҥа, иллэрээ сылга диэри оскуоланы букатын сабан, хата, оҕолорум барахсаттар сынньана түһэллэрэ. Быйыл эмиэ оннук буоллаҕа дуу диэн токкоолоспутум, букатын атын хартыына буолан биэрдэ. Оскуоланы олоччу саппакка, аны биирдиилээн кылаастарга эрэ харантыын биллэрэллэр үһү. Саҥа муода!
Ама, ол гирииптэрэ көрүдүөргэ дьаарбайбакка, кылааска эрэ хорҕойон олоруо үһү дуо?! Биир кылааһы үөрэппэтэхтэринэ даҕаны, көрүдүөр устун күүлэйдиир ини. Аны харантыыҥҥа барбыт оҕолор үөрэммит кылаастарыгар атыттар киирдилэр даҕаны көрдөрбүтүнэн иилэ хабан ыллахтара ол. Ыарыы обургу кимтэн да ыйыппата чахчы. Быйылгы гүириип букатын куһаҕаннык киирэр эбит дэһэллэр, хаптарбыт дьон.
Харантыын диэн тугуй? Тоҕо биллэриллэрий? Мин өйдүүрбүнэн, арааһа, оҕо ыалдьыбатын, харыстаннын диэн дьаһал. Биһиэннэрэ кылаас оҕотун уопсай ахсааныттан 20 бырыһыана ыалдьыар диэри үөрэтэ тураллар үһү. Үгүстэри төрөппүттэр үөрэх бырагырааматыттан хаалларымаары, бэйэлэрэ эмтиэкэлии түһэн баран, оскуолаҕа утаараллар. “Кылааһынан муоданы” киллэрэ сылдьан оҕону барытын сутутаары гыналлар дуу?! Оччотугар, хас оҕо бырааска көрдөрөн олорорун итиэннэ хас оҕо ыалдьа-ыалдьа үөрэнэ тиийэрин эмиэ учуоттуур наада этэ. Ити курдук дьаһалы биир бэйэм букатын өйдөөбөппүн. Дьэ, кэмниэ кэнэҕэс Дьокуускай куорат оскуолаларын харантыыҥҥа саппыттар үһү диэн иһиттим. Бэйэтэ эмтиэкэлэнэн төһөлөөх оҕо доруобуйата айгыраабыта эбитэ буолла?! Ааҕан ситиллибэт.
Биэтэс Билээхэп, «Саха сирэ» хаһыат, edersaas.ru