Сүрүн Уопсастыба

Кыйыга саҥа оскуола дьэндэйдэ

Таатта улууһугар Кыйыга «Үөрэх» национальнай бырайыак иитинэн, 90 миэстэлээх саҥа оскуола аһылынна.

СӨ Ил Дархана Айсен Николаев өрөспүүбүлүкэ үөрэх хаачыстыбатынан 15 бастыҥ эрэгийиэн иһигэр киирэригэр соругу туруорбута.
«Үөрэх хаачыстыбатын үрдэтии усулуобуйаны тэрийииттэн уонна оҕону дэгиттэр сайыннарыыттан быһаччы тутулуктаах. Маныаха биһиги саҥа эбийиэктэри киллэриинэн эрэ муҥурдаммакка, үөрэх аныгы эйгэтин тэрийиэхтээхпит«, — диир Ил Дархан.
Дириэктэр Петр Полускин бэлиэтииринэн, эргэ оскуола сэттэ сыллааҕыта хаарбах туруктааҕынан билиниллибит. Онон оҕолор биэс сиринэн үөрэнэргэ күһэллибиттэр. Ол да буоллар, кыһа Саха сирин агро хайысхалаах оскуолаларыгар инники күөҥҥэ сылдьыбыт.
 Уопсайа 2,7 тыһ.кв.м. иэннээх икки мэндиэмэннээх саҥа оскуола киэҥ-куоҥ кылаастардаах, бэртээхэй лабораториялардаах, мастарыскыайдардаах, бибилэтиэкэлээх, мэдиссиинэ хостоох, остолобуойдаах, успуорт уонна аактабай саалалара бааллар. Оскуола таһа сынньанар уонна успуордунан дьарыктанар былаһааккалардаах.
Кыһа «Точка роста» уонна «Цифровая образовательная среда» федеральнай бырагыраамаларга кыттыыта, үөрэнээччилэр аныгы тэхиньиичэскэй сатабылга үөрэнэллэригэр кыаҕы биэрэр, тирэх буолар.
 СӨ Бырабыыталыстыбатын бэрэссэдээтэлин солбуйааччы Сергей Местников бу ураты бэлиэ күнүнэн Ил Дархан уонна Бырабыыталыстыба аатыттан эҕэрдэтин тиэртэ. Дохсун ытыс тыаһыгар доҕуһуоллатан, оскуолаҕа оптуобус ылалларыгар сэртипикээти туттарда.
Кэнники сылларга Таатта улууһугар үс саҥа уһуйаан Ытык Күөлгэ,  култуура-успуорт комплекса уонна уһуйаан Томторго киирбиттэрэ. Билигин Томтор сэлиэнньэтигэр этнокултуурунай комплекс тутулла турар. Маны сэргэ, Саха АССР 100 сылынан,  Чөркөөххө кэлэр сылга П.А.Ойуунускай аатынан култуура-сынньалаҥ киинэ баар буолуо.
0
0
Telegram @edersaas20