Хаҥалас улууһунааҕы тыа хаһаайыстыбатын управлениета иһитиннэрэринэн, кулун тутар 17 күнүгэр Хачыкаат нэһилиэгин Кыһыл Үрүйэ сэлиэнньэтин ипподромугар сылгыһыттар күрэхтэһиилэрэ ыытыллыаҕа.
“Манна хамаанданан уонна биирдиилээн күрэхтэһиэхтэрэ, ону тэҥэ итиннэ олоҕуран “Сылгыһыт күрэҕэ-2023” өрөспүүбүлүкэтээҕи куонкуруска кыттааччылары талыахтара. Хамаанда 4 киһилээх буолуохтаах уонна саха боруода сылгытынан кыттыахтаахтар. “Сатабылаах сылгыһыт” диэн күрэхтэһии уонна “Дьөһөгөй Тойон таҥара сылынан” тиэмэҕэ быыстапка-дьаарбаҥка үгүс киһи интэриэһин тардыаҕа. Ат сүүрдүүтэ буолуоҕа”, — диэтэ оройуон тыа хаһаайыстыбатын департаменын салайааччыта Андрей Архипов.
“Сылгыһыт күрэҕэ-2023” Саха Өрөспүүбүлүкэтин Ил Дарханын 2016 с. атырдьах ыйын 22 күнүнээҕи “Саха Өрөспүүбүлүкэтигэр сылгыны үөрдээн иитиини сайыннарыыга миэрэлэр тустарынан” 1373 №-дээх Ыйааҕар олоҕуран ыытыллар.
Хаҥалас улууһун пресс-сулууспата