Ааспыт субуотаҕа Дьокуускай киинигэр баар Кубалаах күөлгэ (дьоҥҥо-сэргэҕэ өссө “Щорс күөлэ диэнинэн биллэр) күөгүнэн балыктааһыҥҥа күрэхтэһии буолла. Булчуттарга уонна балыксыттарга аналлаах “Байанай” сурунаал эрэдээксийэтэ уонна СӨ булчуттарын уонна балыксыттарын уопсастыбаларын сойууһун киин бырабылыанньата иккис төгүлүн тэрийбит тэрээһиннэригэр эдэрдиин-эмэнниин көхтөөхтүк кытыннылар.
Төһө да бу күн Күөх Боллох Тойон күрэс кыттыылаахтарын көмүс хатырыктааҕынан дэлэччи күндүлээбэтэр, күөгүһүттэр субуотатааҕы сынньалаҥ киэһэлэрин күөл кытылыгар, кус-хаас саҥатын ортотугар атаааран сүрдээҕин астыннылар, биир интэриэстээх саҥа дьону кытта билсэн күө-дьаа буоллулар.
Күрэс буолан баран кыайыылааҕа суох буолбат. Онон бэл биирдии, иккилии мундулаахтар анал номинациялар бастыҥнарынан ааттанан, тэрийээччилэр туруорбут сыаналаах бириистэринэн бэлиэтэннилэр.
Юрий Борисов, “Илгэ” издательскай дьиэ дириэктэрэ, “Байанай” сурунаалы тэрийэн таһаарааччы:
— Куорат олохтоохторун дьиэ кэргэнинэн сынньатар, балыктааһыҥҥа угуйар сыаллаах-соруктаах тэрээһиммитин Кубалаах диэн ааттаабыт күөлбүтүгэр бу иккис сылбытын ыыттыбыт. Былырыын атырдьах ыйыгар тэрийбиппит. Дьон сүрдээҕин сэҥээрэр. Инникитин кыһыҥҥы балыктааһыны, сааскы куйуурдааһыны тэрийэр санаа баар.
Түгэнинэн туһанан, күрэстэһиибитигэр бириис туруорбут спонсордарбар — “Хозмаркет” (Максим Феоктистов), “Росторг” (Трофим Иванов), “Туймаада-нефть” (Степан Чепалов) хампаанньаларга – махтанабын.
Роман Попов, edersaas.ru
Ааптар хаартыскаҕа түһэриитэ.