Ытыктабыллаах Аҕа дойду Улуу сэриитин кыттыылаахтара, тыыл бэтэрээннэрэ!
Күндү Саха сирин олохтоохторо!
Саха Өрөспүүбүлүкэтин Судаарыстыбаннай Мунньаҕын (Ил Түмэнин) аатыттан эһигини Улуу Кыайыы 74 сылын туолар өрөгөйдөөх күнүнэн эҕэрдэлиибин!
Ыам ыйын 9 күнэ – Арассыыйа бары олохтоохторугар, хас биирдии ыалыгар дириҥ суолталаах, ураты өйдөбүллээх ытык бырааһынньык. Бу улуу күн биһиги норуоппут Улуу сэриигэ кыайыылаах тахсыбыта.
Эйэлээх олох иһин уоттаах кыргыһыыларга, хаан тохтуулаах киирсиилэргэ биһиги биир дойдулаахтарбыт хорсуннук сэриилэспиттэрэ, Ийэ сири өстөөхтөн босхолуур туһугар сырдык тыыннарын толук уурбуттара. Бу кэмҥэ тыылга Сахабыт сирин дьоно-сэргэтэ килбиэннээх үлэтинэн Улуу Кыайыыны уһансыбыта.
Аан дойду устуоруйатын хаамыытыгар сабыдыаллаабыт ыар сүтүктээх уонна өрөгөй үктэллээх Улуу Кыайыы суолтата хаһааҥҥытааҕар да ордук күүһүрэр. Ону биһиги, Кыайыыны уһансыбыт көлүөнэ ыччата, мэлдьи өйдүү-саныы сылдьыахтаахпыт.
Эһээлэрбит, аҕаларбыт сырдык ааттара, норуоттарын иннилэригэр оҥорбут өҥөлөрө биһигини барыбытын сомоҕолуур күүстээх. Ол туоһута – Аҕа дойду Улуу сэриитин кыттыылаахтарын ыччата параадка тахсан, хас эмэ тыһыынчанан киһилээх «Өлбөт үйэлээх полк» холуонналарыгар бэйэлэрин чугас дьонун мэтириэттэрин тутан, үтүө ааттарын үйэтитэн сэлэлии хаамсыыта.
Ил Түмэн сэрии кыттыылаахтарыгар, тыыл бэтэрээннэригэр, ити ыар кэм оҕолоругар, огдооболоругар улахан болҕомтотун уурар, онно олоҕуран, кинилэргэ дьоһуннаах усулуобуйаны тэрийэри өйүүр-үбүлүүр сокуоннары ылынар.
Ытыктабыллаах Сахабыт сирин олохтоохторо! Бу күн Кыайыыны уһансыбыт көлүөнэҕэ дириҥ махталбытын биллэрэр, кинилэргэ булгуруйбат санааларын уонна Ийэ дойдуларыгар тапталларын иһин сүгүрүйэр ытык күммүт үүммүтүнэн эҕэрдэлиибин. Эйэлээх олоҕу туойуоҕуҥ, дьоллоох-соргулаах сарсыҥҥыбытын түстүөҕүҥ!
Петр Гоголев, Саха Өрөспүүбүлүкэтин Ил Түмэнин бэрэссэдээтэлэ.