Бүгүн өрөспүүбүлүкэтээҕи медиа-кииҥҥэ буолбут Саха сиринээҕи норуоттар икки ардыларынааҕы VI киинэ бэстибээлин пресс-кэмпириэнсийэтигэр СӨ култууратын, духуобунай сайдыытын миниистирэ Юрий Куприянов, өрөспүүбүлүкэҕэ коронавирус (COVID-19) инфекцията тарҕаныытын бопсорго суһал дьаһаллар ылыллыыларынан, киинэ бэстибээлэ сабыылаах форматынан, дьүүллүүр сүбэҕэ эрэ анаан буоларын иһитиннэрдэ.
edersaas.ru
Хомолтолоох сонун, ол эрээри, бүгүҥҥү быһыы-майгы хайдаҕын бары истэ-билэ сылдьар буолан, дьон-сэргэ доруобуйатын туһугар, итинник быһаарыныы ылыныллыбытын киһи өйдүүр.
Миниистир Юрий Куприянов, Саха сиринээҕи киинэ бэстибээлигэр кыттаары Дьокуускайга бу күннэргэ кэлбит 21 ыалдьыкка дириҥ махталын биллэрдэ.
Пресс-кэмпириэнсийэҕэ бэстибээл сүрүн куонкуруһун дьүүллүүр сүбэтин бэрэссэдээтэлэ Борис Хлебников, документальнай киинэ дьүүллүүр сүбэтин бэрэссэдээтэлэ Ник Холдсворт, бэстибээл бырагырааматын дириэктэрэ Алексей Медведев, толорооччу дириэктэр Ирина Энгелис, режиссердар Эдуард Новиков, Максим Арбугаев, о.д.а. кытыннылар.
Алексей Медведев, скайп-сүбэлэһиинэн, дьүүллүүр сүбэ киирбит үлэлэри икки нэдиэлэ устата барытын ссылканан көрүө, сыаналыа, кыайыылаахтары ааттыа, түмүк саайтка тахсыа диэтэ. Уонна, биллэн турар, кыайыылаахтарга сүрүн бириис – бриллиант киэргэллээх үрүҥ көмүс хаар ачыкыта тиксэриллиэҕэ.
Борис Хлебников, бэстибээлгэ ыҥырыы иһин махтанан туран, Арассыыйаҕа хас даҕаны киинэ бэстибээлэ ыытыллар буоллаҕына, Саха сиринээҕи киинэ бэстибээлэ биир интэриэһинэйдэринэн ааҕыллар уонна үс бастыҥҥа киирсэр диэтэ.
Онон, Саха сиринээҕи норуоттар икки ардыларынааҕы VI киинэ бэстибээлэ сабыылаах форматынан (онлайн) ыытыллар буолла, оттон эһиил 2021 сыллаахха VII бэстибээл ыытыллара былааннанар.
Көрсүһүү кэмигэр ким эрэ бэлиэтээн эппитинии, бу пресс-кэмпириэнсийэ киинэ бэстибээлин аһыы уонна сабыы оннугар буолла диэххэ сөп.
Татьяна МАРКОВА, edersaas.ru
Ааптар хаартыскаҕа түһэриилэрэ