Бүгүн Аллайыаха улууһун Чокуурдаах бөһүөлэгэр “Булчут күнэ” бэрт тэрээһиннээхтик ааста.
Ол курдук, улуус хамаандалара биатлоҥҥа, карабинтан ытыыга, спортиҥҥа, бураны ыытыыга, ойбон алларыытыгар, кутаа уотун оттууга күрэхтэстилэр. Эстафета ыытылынна. Онно, бэл, хапкаан ииппиттэр.
Култуура биллиилээх үлэһитэ Максим Дуткин алгыс сиэрин-туомун ыытта. Индигир эбэҕэ бырааһынньыгы үөрүүлээхтик арыйыыга өрөспүүбүлүкэ былааҕын өрө көтөхтүлэр. Улуус дьаһалтатын баһылыга Яков Елисеев, Аллайыахатааҕы экологияны кэтээн көрүүгэ судаарыстыбаннай иниспиэксийэ начаалынньыга Татьяна Стрюкова кыттааччылары булчут күнүнэн эҕэрдэлээтилэр. Сүрдээх тэтимнээх күрэхтэһии түмүгэр Оленегорскай хамаандата бастаата. Иккискэ – “СӨ ОДьКХ” ГУП хамаандата, үһүскэ – Полиция сотрудниктарын хамаандата, төрдүскэ – “Чокуур +”, бэһискэ – аэропуорт хамаандата.
Кыайыылаахтары наҕараадалааһыҥҥа общиналар баһылыктара, урбаанньыттар көхтөөхтүк кытыннылар. Улуус баһылыга Яков Елисеев бастаабыт хамаандаҕа тэлэбиисэр, Русскай Устье баһылыга Сергей Суздалов термопот туттардылар. Экология иниспиэксийэтэ 200 лиитэрэ бэнсиини биэрдэ. Ону тэҥэ оленегорскайдар “Чокуур +” анал бирииһин ылан үөрдүлэр-көттүлэр.
Иккис миэстэҕэ – бөһүөлэк баһылыга Шагабеев Р.Н. похуот остуолун, Суздалов С.А. ууну ыраастыыр тэрили, барбекю эрэһиэккэтин, “ИП Бережнов С.В.”балаакканы туттардылар.
Үһүс миэстэҕэ – Маассабай успуорт уонна ыччат бэлиитикэтин управлениета 50 миэтэрэлээх удлинитель катушкатын, Бережнов С.В., Суздалов С.А. бэлэхтэрин биэрдилэр. Ойоотун” баһылыга В.В.Нестеров сэртипикээти анаата.
Карабинынан ытыыга, спортиҥҥа кыайыылаахтарга “Эйвни” община баһылыга Валериан Стрюков бэртээхэй бирииһин бэлэмнээбит. “Бураны бастыҥ ыытааччыга” биллэр урбаанньыт Галина Гуслева шашлык оҥорор тэрили, биатлон кыайыылаҕар Алексей Едукин радиоприемник туттардылар. 4-5 миэстэҕэ “ИП Бережнов С.В.”, Булт быраабылатын билиигэ экология викторинатын кыайыылааҕар — аэропуорт хамаандатын хапытааныгар Уваровскай Владимирга урбаанньыт Галина Макарова бириистэрин үөрэ-көтө туттардылар.
Сүрдээх сэргэх күрэхтэһиини Экология иниспиэксиэйтин кытта Н.В.Киселев аатынан спорт комплекс тириэньэрдэрэ (П.И.Аржаков), Култуура, Маассабай успуорт, култуура уонна ыччат бэлиитикэтин управлениета (А.А.Суздалова) тэрийдилэр. Кыайыылаах Оленегорскай хамаандатыгар көһө сылдьар кубогы туттардылар. Дьэ, эһиил ким кыайар?
Бэлэмнээтэ Женни Стрюкова, edersaas.ru
Хаартысканы: Аллайыахатааҕы экологияны кэтээн көрүүгэ судаарыстыбаннай иниспиэксийэ ыытта.