Кыайыылаах кылаас өрөспүүбүлүкэ таһыгар билиитин-көрүүтүн хаҥата барыа
Сайыҥҥы сынньалаҥы аахсыбакка, Уус Алдан улууһун оскуолаларын үрдүкү кылааһын оҕолоругар бэртээхэй күрэхтэһии буолла. Бу туһунан биһиэхэ улуустааҕы үөрэх управлениетын начаалынньыга Ирина Тарская иһитиннэрдэ.
Уус Алдаҥҥа быйылгы сылы улуус дьаһалтата Оҕо-аймах сылынан биллэрбитэ. Итинтэн сиэттэрэн, кэнчээри ыччакка ананар үлэ өссө далааһыннаммыта.
—Оҕолор билиилэрэ-көрүүлэрэ дириҥииригэр, уопсастыбаннай олоххо көхтөөхтүк кытталларыгар, кылааһы, кэлэктииби түмэр, төрөппүтү, учууталы уонна оҕону биир сомоҕо оҥорор сыаллаах-соруктаах күрэстэһиигэ 9-10 кылаастартан кыттыан баҕалаахтар күөн көрүстүлэр.
Бастакы түһүмэх кэтэхтэн ыытыллыбыта. Манна кылаас үөрэххэ ситиһиитэ, бэрээдэгэ, төрөппүттэр кылаас олоҕор өйөбүллэрэ, үөрэнээччилэр биир сомоҕо уонна тимуровскай хамсааһыннарга кыттыылара, о.д.а. көрүлүннүлэр. Үлэлэрин, үөрэхтэрин туһунан сырдатан нэһилиэктэртэн сүүрбэччэ кылаас портфолиотын ыыппыта. Ол түмүгүнэн, уопсайа уон кылаас полуфиналга киллэриллибитэ, — диир Ирина Михайловна.
Итилэртэн “Уолан” гимназия, Мүрү 1, 2-с №-дээх, Тулуна, Бэйдиҥэ, Суотту оскуолаларыттан кыттыбыт кылаастар түмүктүүр күрэскэ киирэр быраабы ылбыттар. Кинилэр нэдиэлэ бүтүүтэ Бороҕоҥҥо түмсэн, күөн күрэскэ кыттыбыттар. Манна үөрэнээччилэр кылаастарын билиһиннэрииттэн саҕалаан, кэлэктиип олоҕун сырдаппыттар, мусукаалынай эҕэрдэлэрин тиэрдибиттэр. Маныаха Ирина Михайловна төрөппүттэр көхтөөх кыттыыларыттан улаханнык үөрбүтүн бэлиэтиир.
Дьүүллүүр сүбэҕэ улуус баһылыга Алексей Федотов, улуустааҕы үөрэх управлениетын начаалынньыга Ирина Тарская, култуура управлениетын начаалынньыга Иннокентий Аммосов, улуус дьаһалтатын исписэлиистэрэ үлэлээбиттэр.
Түмүккэ, Мүрү 2-с №-дээх оскуолатын 10-с «А» кылааһа бастаан, улуус дьаһалтата өрөспүүбүлүкэ таһыгар кылааһынан билиини-көрүүнү хаҥата барарга анаабыт сэртипикээтин тутан үөрүүлэрэ үрдээбит. Иккис миэстэҕэ “Уолан” гимназия 9 «А» кылааһын үөрэнээччилэрэ тахсан, кылаастарын материальнай базатын хаҥатарга сэртипикээтинэн наҕараадаламмыттар. Үһүс миэстэҕэ тиксибит Бэйдиҥэ онус кылааһын кэлэктиибэ эмиэ сэртипикээт туппут. Тулуна, Суотту, Мүрү 1 №-дээх оскуолалара биһирэбил бириискэ тиксибиттэр.
Долгутуулаах тэрээһиҥҥэ улуус баһылыга, маннык күрэхтэһии сылын аайы ыытыллара былааннанарын туһунан иһитиннэрэн, оҕолору, төрөппүттэри уонна учууталлары улаханнык үөрдүбүт.
Биһиги корр., «Саха сирэ» хаһыат, edersaas.ru