2017 сыл спорка календарын ким-хайа иннинэ саахыматчыттар арыйдылар. Тохсунньу 4-7 күннэригэр, түөрт күн тэбэн туран, биэс сыллааҕыта биһиги кэккэбититтэн хомолтолоохтук туораабыт Владимир Наумов кэриэһигэр өрөспүүбүлүкэ улахан турнира ыытылынна.
Билиҥҥи кэм ирдэбилинэн ЭЛО рейтинэ ааҕыллар буолан, кыттааччыта да элбэх – барыта 67 киһи суруйтарда, ол иһигэр 3 маастар, 11 маастарга хандьыдаат, 35 бастакы разрядтаахтар. Улуустартан саамай элбэх кыттааччы Уус Алдантан, Үөһээ Бүлүүттэн кэлбиттэр.
Маастар Роман Ганжуров, маастарга хандьыдаат Нариман Мустафин түөртэ субуруччу хотон инники чорбойдулар. Өссө 4 оонньооччу 3,5-дыы очукуоланан, лидердэри эккирэтэллэр. Нам маастарга хандьыдаата Ньургун Винокуров 3 очукуолаахтар халыҥ бөлөхтөрүгэр баар. Ол эрэн, бэһис тууртан балаһыанньа уларыйда. Лидердэр сирэй көрсүһүүлэрэ Н.Мустафин туһатыгар түмүктэннэ. Итинтэн тэптэрэн маастар Р.Ганжуров алтыс туурга Айтал Местниковка эмиэ хоттордо. Адьас кыайыынан испит Н.Мустафин бу туурга эдэркээн маастар, үөрэнээччи Айсен Местниковтан хотторуу хомолтотун биллэ. Онон бырааттыы Местниковтар 5,5-дыы очукуолаах инники таҕыстылар.
Хаһан да буоларын курдук, икки тиһэх туурдар быһаардылар. Адьас бастыыр кыахтаммыт Айтал маастарга хандьыдаат Айсен Федоровы (Уус Алдан) утары “Кора-Кан көмүскэниитигэр” фигура сүүйтэрдэ, онтон тиһэх оонньууга үрүҥүнэн Н.Мустафиҥҥа хоттордо. Убайа Айсен Нь.Винокуровка хотторон, түмүгэр төрдүс миэстэҕэ үтүрүлүннэ. Ол оннугар турнир иккис аҥарыгар наар кыайыыны сурунан Ньургун Винокуров 7 очукуоланна уонна эрэллээхтик бастаата. Киниттэн очукуо аҥара хаалан Нариман Мустафин иккис, ХИФУ устудьуона Руслан Пахомов үһүс миэстэлэргэ тигистилэр. Биэс саахыматчыт 6-лыы очукуоланна. Маастар Владимир Таппыров сэттис миэстэлэннэ. Дьахталларга Туйаара Адамова, кыргыттарга Юля Михайлова бастыҥ көрдөрүүлээхтэр.
Афанасий ПАВЛОВ, күрэхтэһии кылаабынай судьуйата.