Улуу Кыайыы 73 сылыгар Емельян Ярославскай аатынан түмэл кэлэктиибэ Дьокуускай куораттааҕы “Сэрии кэмин оҕолоро” түмсүү сэбиэтин кытта сэрии оҕолоругар анаан “Кыайыыга сирдээбит ырыалар” диэн кэпсээн-кэнсиэри олус тэрээһиннээхтик ыыттылар.
Түмэлгэ бэйэтигэр буолбут кэпсээн-кэнсиэри отдел сэбиэдиссэйэ Октябрина Петровна Максимова салайан ыытта. Тылы бастакынан “Сэрии кэмин оҕолоро” түмсүү сэбиэтин бэрэссэдээтэлэ Зинаида Дмитриевна Винокуроваҕа биэрбитигэр сэбиэт туох үлэни ыыппытын уонна инники былааны иһитиннэрэн баран, сэрии кэмин оҕолоругар аналлаах статус бырабыыталыстыба, Ил Түмэн таһымнарыгар туруорсулла сылдьарын, бу күннэргэ быһаарылларын туһунан эрэллээхтик эттэ. Инникитин маннык тэрээһин түмэли кытта түһэрсиллибит сөбүлэһиигэ олоҕуран сыл аайы ыытыллыан туһунан иһитиннэрбитин бэтэрээннэр биһирээн, ытыспыт хабыллыар диэри таһынныбыт.
Дьэ, итинник үөрүүлээх быһыыга-майгыга Мэҥэ Хаҥалас оройуонун I Мэлдьэхси нэһилиэгэр Мас Булгунньах сэттэ кылаастах оскуолатыгар бииргэ үөрэммит биир дойдулааҕым, сэрии кэмин оҕото, ырыаһыт Дмитрий Тихонов сэрии тиэмэтигэр өрө көтөҕүллүүлээх патриотическай ырыалары — Илья Чаҕылҕан тылларыгар, Андрей Костин матыыбыгар “Хайыһар”, О. Колычев тылларыгар, Александр Александров матыыбыгар “Сэбиэскэй Аармыйа туһунан ырыа”, Күннүк Уурастыырап тылларыгар, норуот матыыбыгар “Сталин”, Эллэй тылларыгар, нуучча идэтийбит ырыаһыта, РФ үтүөлээх артыыһа Антонида Клещева матыыбыгар “Өкүлүүн” толордо. Ону таһынан сэрии кэнниттэн суруллубут ырыалары — поэт Иван Арбита тылларыгар, Антон Борисов матыыбыгар “Мин сэриилэһэ барабын”, Василий Петров-Айыл тылларыгар, эдэр мелодист Октябрина Аянитова матыыбыгар “Сүөдэрбит – сахабыт дуолана” диэн Федор Охлопков төрөөбүтэ 110 сылыгар аналлаах саҥа ырыаны дьон истиитигэр аан маҥнай таһааран итиэннэ Степан Дадаскинов тылларыгар, Леонид Хорунов матыыбыгар “Сайсары күөлүгэр”, Степан Тимофеев тылларыгар, Георгий Никифоров матыыбыгар “Эйэ, дьол иһин”, Дарья Неустроева тылларыгар, Иннокентий Цыпандин матыыбыгар “Сэрии сылын оҕолоро” ырыалары чөллөркөй, ыраас куолаһынан ньиргитэ ыллаан, бэтэрээннэр сүрэхтэрин манньытта.
Биһиги кэпсээн-кэнсиэри астына-дуоһуйа көрдүбүт. Тэрийээччилэрбитигэр Зинаида Дмитриевнаҕа уонна Октябрина Петровнаҕа махтал! Маннык үтүө тэрээһин сыл аайы буола турдун. Күүтүөхпүт.
Иннокентий СИДОРОВ, норуот хаhаайыстыбатын үтүөлээх үлэhитэ,
Үөhээ Бүлүү улууhун уонна Мэҥэ Хаҥалас улууһун I Мэлдьэхси нэhилиэгин ытык киһитэ,
профсойуус хамсааhынын уонна тыа хаhаайыстыбатын бэтэрээнэ.