Дьокуускайга Улуу Кыайыы күнүн көрсө байаанынан ырыа ыллаатылар.
Ол курдук, куорат олохтоохторо уонна ыалдьыттара, сэрии уонна тыыл бэтэрээннэрэ Степан Васильев байааҥҥа доҕуһуоллаах Татьяна Наумова ырыатын астына иһиттилэр. «Ньургуйаана ньургуһун» ырыатынан эҕэрдэтин ытыс тыаһынан көрүстүлэр.
Владимир Дакаяров байааҥҥа оонньуу-оонньуу «Төрөөбүт алааскын эн таптаа» ырыаны толордо. Владимир Гагарин «Күөх Тааттам үрэҕэр» ырыатынан уонна Гагарин диэн араспаанньатынан дьону кэрэхсэттэ. Байааҥҥа эмиэ Степан Васильев доҕуһуоллаата. Ырыа быыһыгар үҥкүү ансаамбыла «Синий платочек» үҥкүүнэн эҕэрдэлээтэ. Сардаана Трофимова
«Сааскы кэм барахсан» ырыата ырыа ылланар күнүгэр-дьылыгар сөп түбэстэ. Ити курдук бииртэн биир ырыалар Кыайыы бырааһынньыгын чугаһатан, дьоҥҥо үөрүүнү-көтүүнү бэлэхтээтилэр.
Бэлэмнээтэ Женни Стрюкова