Саха сирин уонна Арассыыйа норуодунай артыыһа Александр Самсонов «Память бессмертна» кинигэтин биһирэмэ буолла.
Дьокуускайга СӨ Национальнай бибилэтиэкэтин историяҕа саалатыгар «Память бессмертна» диэн СӨ уонна Арассыыйа норуодунай артыыһа, РФ үтүөлээх артыыһа, «Патриот России», «Борец за мир» мэтээллэр кавалердара, «Гордость Якутии» бириэмийэ лауреата, Дьокуускай куорат уонна Саха Өрөспүүбүлүкэтин бочуоттаах гражданина,»Знание России» уопсастыба биир саамай көхтөөх кыттааччыта, «Кыайыы ырыаһыта» Александр Самсонов кинигэтин биһирэмэ буолла. Бу туһунан СӨ Үлэ уонна социальнай сайдыы министиэристибэтин пресс-сулууспата иһитиннэрдэ.
«Бу кинигэ бэчээттэнэн тахсыыта эдэр көлүөнэҕэ ол ааспыт иэдээннээх кэмнэри, дьоруойдуу хорсун быһыылары умуннарбат. Александр Парфеньевич ураты уонна олус улахан үлэтэ Улуу Кыайыыны үйэтитэр, бу биһиги дьон-сэргэ эйэлээх олоххо дьулуһуутун, кинилэр үөрүүлэрин сүрэхпитигэр иҥэрэрбитигэр, харыстыырбытыгар, итиэннэ ытык дьоммут иннилэригэр сүгүрүйэр эбээһинэстээхпитин өйдүүрбүтүгэр сирдиир», — диэтэ СӨ Үлэ уонна социальнай сайдыы миниистирэ Елена Волкова.
Кинигэ-альбом Улуу Кыайыы 75 сылынан таҕыста. Манна тиэмэлэринэн арахсар. Уоттаах сэрии бэтэрээннэрин кытары долгутуулаах истиҥ көрсүһүү, артыыс кэнсиэртэрин уонна өрөспүүбүлүкэ устун айанын туһунан киллэриллибиттэр. Александр Самсонов альбомҥа бүтүн өрөспүүбүлүкэҕэ сылдьыбытын, куораттарга, оройуоннарга тиийбитин, Москваҕа, Петербурга Улуу Кыайыыны уһансыбыттарга анаан кэнсиэртээбитин туһунан сэһэргиир. Ааптар өр сыллаах үлэтигэр тыыл, үлэ уонна сэрии бэтэрээннэрин өрөспүүбүлүкэтээҕи Сэбиэтин өйөбүлүн бэлиэтээн туран махтанар.
«Аҕа дойду уоттаах сэриитигэр Улуу Кыайыы туһунан умнуллуон хайдах да сатаммат. Итиэннэ Улуу Кыайыы туох да токурутуута суох көлүөнэттэн көлүөнэҕэ харстанан, бэриллэн иһиэхтээх. Кинигэ Улуу Өйдөбүлү үйэтитэр», — диэтэ кини.
Уоттаах сэрии тиэмэтэ кинигэ ааптарыгар чугас — кини икки убайа Владимир Парфеньевич уонна Николай Парфеньевич Аҕа дойду сэриитин кыттыылаахтара.
Кинигэ «Медиа – Холдинг Якутия» издательствоҕа «Победа 75» өрөспүүбүлүкэтээҕи пуонда, медиахолдинг уонна Самсоновтар дьиэ кэргэн табаарыстарын өйөбүлүнэн бэчээттэнэн таҕыста.
Кинигэ биһирэмигэр СӨ бэтэрээннэрин сэбиэтин бочуоттаах бэрэссэдээтэлэ Будимир Слепцов, «Ресурсный центр социальной защиты «Победа» ГБУ дириэктэрэ, СӨ бэтэрээннэрин өрөспүүбүлүкэтээҕи сэбиэтин бэрэссэдээтэлин бастакы солбуйааччы Галина Лебедева, «Знание» уопсастыба бочуоттаах бэрэссэдээтэлэ Василий Иванов, үрдүкү салалта бэрэстэбиитэллэрэ, уопсастыбаннас, ааптар чугас дьоно-сэргэтэ, доҕотторо кыттыыны ыллылар.
+1
+1
+1
+1
+1
+1
+1