Бүгүн, ыам ыйын 12 күнүгэр, Улуу Кыайыы ырыаларын ыллыыр РФ үтүөлээх артыыһа, Саха АССР норуодунай артыыһа, Дьокуускай куорат бочуоттаах олохтооҕо Александр Самсонов Улуу Кыайыы 77 сылыгар анаммыт быыстапката Саха сирин норуоттарын музыкатын уонна фольклорун түмэлигэр аһылынна.
Бу быыстапкаҕа Александр Парфеньевич бүтүн өрөспүүбүлүкэни гостуруоллаан кэрийбит хаартыскалара, илиинэн суруллубут Кыайыы 55, 60, 65, 70 сылларыгар анаммыт альбомнар, ырыанньыктар, ырыаһыт грамофоннай пластинкалара, дискэлэрэ быыстапкаҕа турдулар.
Бу быыстапка уратылаах. Ол курдук быыстапкаҕа турбут альбомҥа бэйэҥ эбэтэр эһэҥ, эбэҥ хаартыскатын буллаххына, ону Александр Парфеньевич бэлэх уунар эбит. Альбомнарга кини улуустарынан кэрийэн кэнсиэрдээбит, бэтэрээннэри кытта түспүт хаартыската үгүс. Онон бэтэрээн эһэҥ, эбэҥ, чугас аймаҕыҥ хаартыскатын мантан булуоххун сөп.
Быыстапка арыллыытыгар Марха 2-с №-дээх уонна Хатастааҕы П.Н. уонна Н.Е.Самсоновтар ааттарын сүгэр оскуола үөрэнээччилэрэ кэлэн байыаннай ырыалары ыллаан Александр Парфеньевиһы уйадыттылар.
Ульяна ЗАХАРОВА.
Ааптар хаартыскаҕа түһэриилэрэ.