Улуу Кыайыы өрөгөйдөөх күнүн айхаллаан, ыам ыйын 12 күнүгэр, РФ Үтүөлээх артыыһа, САССР норуодунай артыыһа, Дьокуускай куорат Бочуоттаах гражданина Александр Парфеньевич Самсонов «Александр Самсонов – Кыайыы ырыаһыта» диэн быыстапката үөрүүлээх быһыыга-майгыга арыллар.
Бу долгутуулаах, күүтүүлээх тэрээһиҥҥэ «Туймаада» судаарыстыбаннай вокальнай ансаамбыл, П.Н., Н.Е.Самсоновтар ааттарынан Хатас орто оскуолата, 2 №-дээх Марха орто оскуолата кытталлар. Александр Самсоновы дьон-сэргэ «Кыайыы ырыаһыта» диэн киэн туттан ааттыыр. Кини толорор байыаннай ырыаларын улаханнык долгуйан истэллэр, ис сүрэхтэриттэн иэйэн тэҥҥэ ыллаһаллар. Манна даҕатан эттэххэ, Александр Самсонов сүүрбэттэн тахса сыл устатыгар Дьокуускайга Кыайыы болуоссатыгар «Ыам ыйын вальса» диэн бырагырааманан ситиһиилээхтик кэнсиэртээтэ.
Александр Парфеньевич ыччаты төрөөбүт дойдутун таптыырга, бэриниилээх, үтүө санаалаах буоларга иитиигэ 2000 сылтан утумнаахтык үлэлээтэ. Кини өрөспүүбүлүкэ бары улуустарыгар сылдьан кэнсиэртээтэ, оскуолаларга кылаас чаастарыгар ыалдьыттаата, үүнэр көлүөнэҕэ олоҕун туһунан ахтан-санаан, оҕо сааһын оччотооҕу кэмнэрин, Ийэ дойдуга тапталын кэпсээн болҕомтону улаханнык тарта, кэрэхсэбили ылла.
Быйыл быыстапкаҕа Александр Парфеньевич мала-сала, музей пуондатыттан экспонаттар: архыыптан хаартыскалар, Улуу Кыайыы 55, 60, 65, 70 сылларыгар анаан бэйэтэ оҥорбут альбомнара, кинигэлэрэ, ырыанньыктара, дискэлэр, пластинкалар, о.д.а. көрүөххүт. Сүгүрүйээччилэр тапталлаах ырыаһыттарын ырыатын-тойугун, үлэтин-хамнаһын өссө төгүл сырдатар, билиһиннэрэр быыстапкаҕа сылдьан ахтылҕаннарын таһаарыахтара. Маныаха дьоро күн дьоруойа — Александр Парфеньевич быыстапкаҕа кэлэр дьоҥҥо ураты бэлэҕин уунуоҕа. Ол курдук, биллиилээх ырыаһыт улуустарга гостуруолларга сылдьан, тэрээһиннэргэ түһэрбит хаартыскаларыгар ким эмэ бэйэтин булан ыллаҕына, бу хаартысканы өйдүү-саныы сылдьарыгар Александр Парфеньевичтан бэлэх тутуоҕа.
Быыстапка ыам ыйын 7-28 күннэригэр ыытыллар. Буолар сирэ: Музыка уонна фольклор мусуойа. Сэҥээрбиттэр сиһилии 35-38-84, 8961-868-46-64 нүөмэргэ эрийэн ыйыталаһыаххытын сөп.