Кыайыы туһунан ырыата ыллыахха

Бөлөххө киир:

СӨ Суруйааччыларын сойууһун чилиэнэ, бэйиэт, мелодист, СӨ култууратын үтүөлээх үлэһитэ, СӨ муниципальнай сулууспатын, СӨ култууратын, СӨ тыатын хаһаайыстыбатын туйгуна, М.К.Аммосов аатынан анал бэлиэ хаһаайына, Николай Рыкунов аатынан бириэмийэ лауреата, Нам улууһун, Хамаҕатта нэһилиэгин Бочуоттаах олохтооҕо Александр Григорьевич Дунаев үгүс ахсааннаах хоһоонноруттан Кыайыы тиэмэтигэр элбэх хоһоону булуохха сөп.

edersaas.ru

Оттон бүгүн кини Кыайыыга анаммыт хоһоонноругар айбыт мелодияларын билсиэҕиҥ уонна тэҥҥэ ыллаһыаҕыҥ.

ТУРУЙАЛАР

(И.Эртюков тыллара, А.Дунаев мелодията)

Сэриини билбэт ээ, туруйа!
Сэлэлии көтөн кэллэхтэрин!
Онно дуо туруйа буруйа?!
Саас кэлбитин билбиттэрэ.

Саллааттар утуйа сыталлар
Сааскы күн сыламын анныгар.
Түһээннэр ханна сылдьаллар?
Сылдьаллар -– дойдуларыгар.

Хос ырыата:
Туруйалар, хаһыытаамаҥ!
Саллааттары туруортаамаҥ.
Туруйалар, уйгуурдумаҥ,
Утуйдуннар, сынньанныннар.


АҔЫЙААН ТУРАҔЫТ БҮГҮН

(Н.Винокуров-Урсун тыллара, А.Дунаев мелодията)

Күөгэйэр эдэр сааскыт
Үйэ аҥара ааспыт.
Буорах уота салаабыт
Саалырсыйда астаргыт.

Хос ырыата:
Оҕонньоттор барахсаттар
Аҕыйаан тураҕыт бүгүн,
Аас баттах, харах уута,
Дууһаҕыт кыланыыта!

Ыар аһыыны биллэрэн
Көхсүлэргит холбойбут,
Сүүрэр-хаамар аҕыйаан
Үгүскүт тайахтаммыт.

Хос ырыата:
Оо, билигин даҕаны,
Кыайыы күнүгэр кэлэн,
Түөскүт өрө мөтөйөр
Мэтээллэргэ күн күлэр.


СААС

(Даадар тыллара, А.Дунаев мелодията)

Умайар халлаантан
Унаар күөх уоттанна,
Толбонноох халлаантан
Тохтор кыым суостанна.
Чаллах тиит таһыгар
Чалбах уу чарылыыр,
Халдьаайы анныгар
Халаан уу харалыыр.

Хос ырыата:
Көрүөххэ үчүгэй
Күннэр дьэ үүннүлэр!
Сылдьыахха үчүгэй
Сылаастар түстүлэр!
Көмүстээх кынаттаах
Көтөрдөр кэллилэр.
Саймаардар ырыалар
Салалаан истилэр.
Көҕөрбүт үрэхпэр
Көҕөттөр туоллулар,
Кулуһун күөллэрбэр
Кубалан хоннулар.

Хос ырыата.

Кыталык кыылларым,
Кылбаарар халлааным
Кырсынан сылдьаннар
Кыҥкыныы ыллыыллар.
Толбонноох толооннор,
Торҕо күөх тоҕойдор
Налыһан хамсыыллар,
Нарыннык тыаһыыллар.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0