Улуу Кыайыы 75 сыллаах үбүлүөйдээх бырааһынньыгын саха тыйаатырын кэлэктиибэ быйыл уратытык бэлиэтээтэ.
edersaas.ru
Ол туһунан тыйаатыр дириэктэрэ, СӨ култууратын туйгуна Петр Макаров маннык кэпсээтэ:
«Биһиги тыйаатырбыт кэлэктиибэ Улуу Кыайыы бырааһынньыгын сылын ахсын үгэс курдук, куорат киин болуоссаттарыгар тахсан көрсөрө. Бэтэрээннэрбитин ыҥыран, остуол тардан эҕэрдэлиир этибит. Быйыл, дьиэҕэ хааччахтаныы уустук кэмигэр, Кыайыы бырааһынньыгын атыннык да буоллар бэлиэтээтибит. Бу күн 70-тан үөһэ саастаах үлэһиттэрбитин барыларын Улуу Кыайыы күнүнэн эҕэрдэлээтибит. Тыйаатыр дириэксийэтин уонна идэлээх сойуустар холбоһуктарын аатыттан аһынан-үөлүнэн көмө оҥордубут. Бэлэхтэри, бары ирдэбили тутуһан туран, дьиэлэригэр тиийэн туттардыбыт. Бэтэрээннэрбитин, тыйаатыр бары артыыстара ырыанан-хоһоонунан, ыраахтан да буоллар, эҕэрдэлээтибит. Бу күннэргэ тыйаатыр бары артыыстара сэрии суруктарын, хоһооннорун социальнай ситим нөҥүө аахтылар, сэрии ырыаларын ыллаатылар.
Уоттаах сэрии сылларынааҕы биир идэлээхтэрбит үтүө бачыымнарыгар сүгүрүйэн “Кыайыы тааҥката” диэн аахсыйаҕа кыттыһан, култуура эйгэтигэр, тыйаатырга үлэлии сылдьыбыт, кыайыыны уһансыбыт ытык кырдьаҕастарбыт, сэрии бэтэрээннэрин, тыыл үлэһиттэрин хаартыскаларыттан истиэндэ оҥорон тыйаатыр иннигэр туруордубут”.
Биллэрин курдук, сэрии сылларыгар саха национальнай тыйаатырын артыыстара “Дьулуруйар Ньургун Боотур” айымньыны нэһилиэнньэҕэ хаста да көрдөрөн, барыта 158 300 солкуобайы хомуйан, Т-34 тааҥка оҥоһулларыгар анаан ыыппыттара.
Ньургуйаана Иванова, “Саха сирэ” хаһыат, edersaas.ru
Хаартыска Саха тыйаатырын пресс-кииниттэн