Аатырбыт снайпер Иван Кульбертиновка аналлаах скульптура эскиһин бастыҥ бырайыагын талыы күрэҕэ түмүктэннэ. Дьүүллүүр сүбэ бастыҥ үлэни талла.
edersaas.ru
СӨ Ил Дарханын иһинэн үлэлиир архитектура уонна куораттары тутуу управлениета иилээн-саҕалаан ыыппыт күрэҕэр уопсайа сэттэ хамаанда кыттан, 15 үлэни сыаналаатылар.
Дьүүллүүр сүбэ састаабыгар Саха сирин худуоһунньуктарын сойууһун бэрэссэдээтэлэ Василий Амыдаев, Дьокуускай куорат кылаабынай архитектора Семен Сергеев, Саха сирин архитектордарын сойууһун бэрэссэдээтэлэ Семен Никифоров, профессор, РФ ускуустубатын үтүөлээх диэйэтэлэ Зинаида Иванова-Унарова, Иван Кульбертинов уола Иван Кульбертинов уонна да атыттар киирбиттэрэ.
Үлэлэри сыаналыырга ааптардар ааттарын ыйбатахтар. Хас биирдиилэригэр шифр олохтоммут. Дьүүллүүр сүбэ 15 үлэттэн саамай бастыҥынан 337799-1 шифрдаах үлэни бастыҥынан сыаналаабыт. Үлэ ааптардара – Арассыыйа худуоһунньуктарын сойууһун чилиэнэ, СӨ култууратын туйгуна, скульптор Николай Чоччасов уонна Арассыыйа уонна Саха сирин архитектордарын сойууһун чилиэнэ, архитектор Марина Рожина буолаллар.
“Скульптура Ивана Николаевич Кульбертинов уобараһын сэбиэскэй саллаат эрэ буолбакка, эбэҥки норуотун улуу уолун быһыытынан арыйар, — диэн ааптардар санааларын үллэһиннилэр.
Улуус снайпер өйдөбүнньүгэ Дьокуускай куоракка Өктөөп 50 сылынан автострада кытыытыгар Кыайыы пааркатыгар туруоруллуоҕа. Паарканы аһыы-сиэрэ туома Дьокуускай куорат күнүгэр ыытыллыахтаах.
edersaas.ru