Дьокуускайга Кыайыы пааркатыгар долгутуулаах тэрээһин буолла.
Аҕа дойду уоттаах сэриитигэр Улуу Кыайыы 77 сылын көрсө бүгүн, ыам ыйын 8 күнүгэр, Дьокуускай куоракка Гагарин уокуругар Кыайыы пааркатыгар, тыыннаах сибэкки дьөрбөтүн ууруу долгутуулаах тэрээһинэ дьону-сэргэни түмэ тарта.
Тэрээһиҥҥэ уоттаах сэрии толоонугар сырдык тыыннарын толук уурбут буойуттаргы, тыылга бэйэлэрин харыстаммакка үлэлээбит ытык дьоҥҥо сүгүрүйэн, салалта бэрэстэбиитэллэрэ, уопсастыбаннас, дьокутааттар, оскуола үөрэнээччилэрэ мүнүүтэ устата саҥата суох турдулар. Кыайыы стелатыгар, «Кыайыы саллаатын дьиэ кэргэнэ» пааматынньыкка уонна Аҕа дойду уоттаах сэриитин дьоруойун, легендарнай снайпер Иван Кульбертинов пааматынньыгар сибэкки дьөрбөлөрүн уурдулар.
СӨ Ил Дарханын уонна Бырабыыталыстыба аатыттан Улуу Кыайыы өрөгөйдөөх күнүн көрсө мустубут дьоҥҥо туһаайан эҕэрдэтин Ыччат дьыалатыгар уонна социальнай коммуникацияларга миниистир Петр Шамаев тиэртэ.
Истиҥ эҕэрдэтин Дьокуускай куорат мээрэ Евгений Григорьев эмиэ тиэртэ: —Биһиги бүгүн Кыайыы пааркатын киин болуоссатыгар мустан турабыт. Парка бастакы түһүмэҕэ тутуллан олоххо киллэрилиннэ, снайпер Иван Кульбертиновка пааматынньык тутуллубута, Кыайыы стелата, «Кыайыы саллаатын дьиэ кэргэнэ» пааматынньык туруоруллубуттара. Чугастааҕы кэмҥэ паарка ситэригэр-хоторугар үлэ тиһиктээхтик салҕанар. Бу дьону-сэргэни түмэ тардар, ытык кырдьаҕастарбытын, өбүгэлэрбитин истиҥник өйдөөн-санаан, ахтан, кэриэстээн ааһар сирбитинэн буолуон баҕарабыт. Манна дьон-сэргэ оҕолорун, сиэннэрин Кыайыы эрэ күнүгэр буолбакка, хаһан баҕарар кэлэн эйэлээх олоҕу уһансыбыт буойуттарга уонна тыылга үлэлээбит дьонноругар-сэргэлэригэр сүгүрүйэн барыахтара.
Гагарин уокуругун бэтэрээннэрин Сэбиэтин бэрэссэдээтэлэ, Саха сирин авиациятын бэтэрээнэ Александр Архипов: «Аҕа дойду сэриитэ таарыйбатах дьиэ кэргэнэ диэн суох. Улуу Кыайыы 77 сылын көрсө бары бэтэрээннэргэ, сэрии ыар сылларын тулуйбут ытык кырдьаҕастарга, фроҥҥа туох баар сыраларын ууран көмөлөспүт ытык дьоҥҥо сүгүрүйэбин, махтанабын», — диэтэ.
Сибэккини уурууга Ил Түмэн экэнэмиичэскэй, инвестиционнай уонна бырамыысыланнай бэлиитикэҕэ сис кэмитиэтин бэрэссэдээтэлэ Павел Петров, Үп миниистирэ Валерий Жондоров, Экологияҕа, айылҕаны туһаныыга уонна ойуур хаһаайыстыбатыгар миниистир э.т. Евгений Перфильев, уо.д.а. кыттыыны ыллылар.
Санатан эттэххэ, Кыайыы пааркатыгар Өйдөбүнньүк стела 2020 сыллаахха балаҕан ыйыгар, Дьокуускай куорат күнүгэр, үөрүүлээх быһыыга-майгыга арыллыбыта. Паарка сирин-уотун тупсарыы үлэтэ мантан саҕаламмыта. Бу сыл сэтинньи 7 күнүгэр, чулуу снайпер Иван Кульбертинов төрөөбүтэ 103 сылыгар, пааматынньыгы арыйыы долгутуулаах тэрээһинэ буолбута. «Кыайыы саллаатын дьиэ кэргэнигэр» анаммыт пааматынньык 2021 сыллаахха балаҕан ыйын 27 күнүгэр — СӨ судаарыстыбаннаһын күнүгэр, баар буолбута.
Хаартыскаларга Мария Васильева (СИА) түһэриилэрэ
+1
+1
+1
+1
+1
+1
+1