Саха сирин олохтоохторун Кыайыы музейа «Ускуустуба түүнүгэр» ыҥырар.
«Түмэл сыл ахсын аахсыйаҕа кыттар. Быйылгы тэрээһин коронавирус дьаҥын тарҕаппат туһуттан, куйаар ситиминэн ыытыллар. Онон дьиэҕитигэр олорон эрэ, култуура диэйэтэллэрэ Улуу Кыайыыгы киллэрсибит кылааттарын билсиэххит, көрүөххүт. Оччотооҕу ырыалар, хоһооннор, киинэлэр Сэбиэскэй норуот өйүн-санаатын хайдахтаах өрө көтөхпүттэрин, бөҕөргөппүттэрин, күүһүрдүбүттэрин, Кыайыыга эрэли сахпыттарын билсиэххит», — диэн Кыайыы музейын дириэктэрэ Александр Школьник этэр.
Музейга ыалдьыттары «Художники Победы» диэн быыстапкаҕа экскурсия-викторинаҕа кыттарга ыҥыраллар. Ыалдьыттарга Аҕа дойду сэриитигэр кыттыбыт худуоһунньуктар сэрии туһунан үлэлэрин көрдөрүөхтэрэ. Николая Обрыньба, Орест Верейскэй, Александр Богданов, Екатерина Зернова, Константин Солнцев, Борис Неменскэй уо.д.а. үлэлэрин көрүөххүт.
Аахсыйаҕа уруһуйдуоххутун эмиэ сөп. Маастар-кылааһы эһиэхэ анаан худуоһунньук Ирина Краснова ыытыаҕа. YouTube-ханаалга видео-кэнсиэр буолуоҕа. «Темная ночь», «Смуглянка», «Прощание славянки», о.д.а. өйгө-сүрэххэ иҥмит ырыалары эдэр ырыаһыттар толоруохтара.
Кыайыыны уһансыыга артыыстар кылааттарын туһунан «Фронтовые бригады» быыстапкаҕа билсиэххит. Онлайн-экспозицияҕа 90 тахса хаартыска, афишалар, хартыыналар киллэрилиннилэр диэн суруллар. Манна 1941 сыл сайыныттан саҕаламмыт бастакы фронтовай биригээдэлэр сэдэх хаартыскаларын көрүөххүт. Любовь Орлова, Клавдия Шульженко, Сергей Лемешев, Леонида Утёсов уонна да атын биллиилээх артыыстар ураты хаартыскалара сүрэҕи-быары долгутуохтара. Манна ууруллубут докумуоннар сэрии толоонугар, госпиталларга буолбут кэнсиэртэр, саллааттар Ийэ дойдуну көмүскүүллэригэр күүстээх санааны артыыстар сахпыттарын тустарынан сэһэргииллэр.
Куйаар ситиминэн киинэ көрдөрүллүө. Анна Синицкая «Ржевский выступ», «Как я снимала кино о своей бабушке» документальнай киинэлэрэ көрөөччүлэри улаханнык долгутуохтара. «Ржевский выступ» тверскойдааҕы «Поколение» көрдүүр-ирдиир этэрээти кытары бииргэ оҥоһуллубут. Бу көрдүүр-ирдиир этэрээт ыччаттара Ржев таһынааҕы ойуурга, сэрии буолан ааспыт сиригэр-уотугар сураҕа суох сүппүт тыһыынчанан саллааттары туох баар кыһамньыларын ууран туран көрдүүллэр. Оттон «Как я снимала кино о своей бабушке» кылгас метражтаах киинэ Мария Синицкая эбэтигэр анаммыт. Эдэркээн кыыс сэрии ыар сылларын алдьархайын уу хараҕынан көрүүтүн, уйулҕаны хамсатар уоттаах сэриини сиэнигэр кэпсиирэ көрөөччүнү улаханнык долгутуо. Кырдьаҕас киһи эдэр көлүөнэҕэ олоҕу таптааҥ, эйэлээх-иллээх буолуҥ диэн баҕарар.
Аахсыйа 20:00 саҕаланар. Сиһилии https://victorymuseum.ru/playbill/events/noch-iskusstv-2020/ саайтка көрүҥ.