Г.М.Кривошапко аатынан Судаарыстыбаннай филармониятын Духобуой оркестрын толоруутугар «День Победы» ырыа ньиргийдэ.
Бу Улуу Кыайыы бырааһынньыга Саха сиригэр Александр Парфеньевич Самсоновы кытта ыкса ситимнээх. Саха норуота кинини таптаан «Кыайыы ырыаһыта» диэн ааттаабыта.
Александр Самсонов 20 сыл устата «Маай вальса» диэн кэнсиэртиир бырагыраамалаах кыттара.
РФ үтүөлээх артыыһа, Саха АССР норуодунай артыыһа, Дьокуускай куорат бочуоттаах олохтооҕо Александр Самсоновтыын кэпсэттим:
— Мин сэрии оҕотобун. Уоттаах Аҕа дойду сэриитэ саҕаламмытыгар мин алталаах уолчаан этим. Сэрии сылларын субу баардыы өйдүүбүн. Икки бииргэ төрөөбүт убайдарым уоттаах сэрии кыттыылаахтара. Биир убайым Волковскай фроҥҥа сэриилэспитэ, иккис убайым сэрии хонуутугар Новороссийскай анныгар охтубута. Сэрии тиэмэтигэр мин оҕо эрдэхпиттэн чугаспын. Тоҕо диэтэххэ, сэрии ыар сылларын, кини сүтүгүн, кыайыытын барытын сүрэхпинэн аһардыбытым. Ырыаһыт буолан баран мин харчылаһаары буолбакка, Кыайыы ырыаларын бар дьоммор тиэрдээри бүтүн өрөспүүбүлүкэни барытын кэнсиэрдээн кэрийбитим. Хас биирдии улууска сылдьыбыт сырдык кэмнэри олус иһирэхтик саныыбын. Холобур, мин Таатта улууһугар сылдьан бэтэрээннэри көрсүбүтүм. Оо, оччолорго бэтэрээннэр барахсаттар элбэхтэр да этэ. Арай биир бэтэрээн миигин ыҥыран ылбыта уонна куругар иилинэ сылдьар эргэ тэтэрээтин ууммута. Тэтэрээккэ буоллаҕына сэрии тиэмэтин хоһоонноро суруллубуттар этэ.
Бэтэрээн барахсан миигин ырыа гыннын диэн биэрээхтээбит этэ. Ол тэтэрээти мин бэйиэт Савва Тарасовка тиксэрбитим. Сылтан сыл ахсын бэтрээннэр ахсааннара аҕыйаан иһэрин хас кэнсиэрдээтэҕим ахсын бэлиэтии көрөрүм. Кэлин ол иһин аны оскуолаларынан сылдьан оҕолордуун көрсөр, кэпсэтэр буолбутум. Бэйэм идэбинэн учуутал буоламмын, оҕолору дойдуга бэриниилээх гына иитиигэ кыра, сэмэй кылааппын киллэрсэргэ дьулуспутум. Мин оҕолортон ыйытааччыбын, тоҕо кыайыы күнэ саамай улахан бырааһынньык дэнэрий диэн. Онуоха оҕолор ардыгар сатаан булан эппиэттээччилэрэ суох. Онуоха мин оҕолорго бу биһиги эйэлээх, холку олохпут иһин эһээлэргит, хос эһээлэргит уоттаах сэриигэ кыргыспыттара, үгүстэр олохторун толук уурбуттара диэн кэпсиирим. 2020 сылтан мин ыллаабаппын. Ол эрээри, мин айар үлэбин интэриэһиргиир дьону барыгытын бу ыам ыйын 12 күнүгэр быыстапкаҕа ыҥырабын. «Муусука уонна фольклор” мусуойугар мин махталым муҥура суох. Кинилэр көҕүлээһиннэринэн быыстапкам турар. Бар дьонум, барыгытын Улуу Кыайыы бырааһынньыгынан эҕэрдэлиибин!
Ульяна ЗАХАРОВА.