Таатта улууһугар, Ытык Күөлгэ, «Сулусчаан» оҕо саадыгар Кыайыы күнүгэр аналлаах тэрээһин нэдиэлэ инниттэн былааннаахтык ыытылынна. Бу туһунан истэн, биһиги оҕо саадын сэбиэдиссэйиттэн Елена Алексееваттан ыйыталастыбыт.
— Бастатан туран, оҕолорбут бука бары Улуу Кыайыы 74 сылын көрсө уруһуйдаабыттара. Ол уруһуйдарынан бэҕэһээ Былатыан Ойуунускай аатынан норуодунай тыйаатырга быыстапка тэрийдибит. Оҕолор төрөппүттэрэ, эһээлэрэ, эбээлэрэ, бииргэ төрөөбүттэрэ, уруулара-аймахтара, нэһилиэк олохтоохторо кэлэн кырачааннарбыт үлэлэрин көрдүлэр-иһиттилэр.
Ыам ыйын 6 күнүгэр оҕолорбутун «Албан аат» музейыгар сырытыннардыбыт.
Музей үлэһитэ, экскурсовод Маргарита Попова оҕолорго Аҕа дойду улуу сэриитин сылларын, дьоммут-сэргэбит Кыайыыны хайдах уһансыбыттарын туһунан кэпсээтэ, батыһыннара сылдьан экспонаттары көрдөрдө. Оҕолор сүрдээҕин боччумуран, болҕойон иһиттилэр.
Онтон бэҕэһээ, ыам ыйын 7 күнүгэр, «Сулусчааммыт» иитиллээччилэрэ байыаннай таҥастаах Кыайыы болуоссатыгар параттаан тиийдилэр. Истиҥ эҕэрдэ кэнниттэн байыаннай ырыалары ыллаабыттара ытыс тыаһынан арыалланна.
Пушканы, тааҥканы көрдүлэр, ыйытыыларыгар хоруйдары ыллылар. Улуу Кыайыы, сэрии, тыыл бэтэрээннэрин, ытык кырдьаҕастар тустарынан сиһилии истибит, билэр буоланнар, кэпсээн, ырыа аргыстаах болуоссаты бэрээдэктээтилэр, бэтэрээннэр мэтириэттэриттэн быылы соттулар. Оннук үөрэ-көтө көмөлөһө, туһалыы сылдьаннар, сорох оҕолорбут хос эһээлэрин, урууларын-аймахтарын хаартыскаларын булан көрөннөр, улаханнык долгуйдулар. Бу кэнниттэн наһаа боччумуран тураннар, дьиэлэригэр төрөппүттэрин кытары оҥорон аҕалбыт сибэккилэрин уурдулар, ытык дьонноругар сүгүрүйэн, мүнүүтэ устата чуумпуран, саҥата суох турдулар.
Бүгүн, ыам ыйын 8 күнүгэр, муора флотугар сулууспалаабыт Иван Рахлеев «Сулусчааннарга» ыалдьыттаата. Иван Федотович аптамаат ыһан-хомуйан көрдөрбүтүн оҕолор, ордук уолаттар, улаханнык сөхтүлэр, астыннылар.
Күндү ыалдьыппыт салгыы аптамааты көрдөрө-көрдөрө кэпсээтэ, быһаарда. Байыаннай тиэмэҕэ бэртээхэй оонньууну тэрийэн ыытта. Салгыы таһырдьа тахсан салют ытан көрдөрүүтэ «Ураа!» хаһыынан уруйданна. Маны сэргэ, бүгүн оҕо саадыгар үлэлээбит бэтэрээннэрдиин истиҥ көрсүһүү буолла, —— диэтэ оҕо саадын сэбиэдиссэйэ Елена Титовна.
Улуу Кыайыы күнүн көрсө тиһиктээхтик тэриллибит тэрээһиҥҥэ, кырачааннар байыаннайдыы хаампыттар, ырыа бөҕөтүн ыллаабыттар, хара килиэби кытары саллаат хааһытын амсайбыттар.
Кырачааннары байыаннайдыы хаамыыга оҕо саадын физкультураҕа инструктора Амгалина Унарова үөрэппит, эрчийбит. Музыка уруогун биэрэр Галина Дуюкова байыаннай ырыалары үөрэппит. Хас биирдии тэрээһин билиини-көрүүнү хаҥатарга туһуламмыт.
Сардаана БАСНАЕВА, «Саха сирэ» хаһыат, edersaas.ru