Дьокуускай куоракка «Сэргэ» комплекс олохтоохторо кэнники үс сылга Улуу Кыайыы күнүн көрсө, ыам ыйын 8 күнүгэр, бэйэлэрин бачыымнарынан уопсай субуотунньукка тахсаллар.
Кинилэр олорор дьиэлэрин эрэ иннин ыраастаабакка, ипподром диэки өртүн бөҕүн эмиэ хомуйаллар. Ол эбэтэр, ыттар ыспыт бөхтөрө эмиэ олус элбэх буолан биэрээччи. Итини таһынан, хомойуох иһин, саҥа дьиэҕэ киирээччилэр тутуу матырыйаалларын хомуйбат түгэннэрэ эмиэ баар. «Утум» курдук хампаанньа тутан киллэрбит дьиэлэрин ити курдук ыспакка-тохпокко, хас биирдиибит бэйэтин бөҕүн хомуна сырыттар диэн баҕалаахпыт. Ону таһынан, куортамнаан олорооччулар эмиэ хомунан, харастабыллаахтык сыһыаннаһан, бу үлэҕэ кыттыһан, эһиил кэккэбит өссө хаҥаатар диэн баҕа санаалаахпыт.
Субуотунньукка кыттан, олохтоохтор Улуу Кыайыынан бэйэ-бэйэлэрин эҕэрдэлэһэн, санаалыын чэпчээн тарҕастылар.
«Саха сирэ» хаһыат, edersaas.ru анаан Августина ХАБАРОВА