Култуура Сүрүн

Кыайыы күнүн көрсө Иван Кульбертиновка аналлаах ырыа

Быйыл Аҕа дойду Улуу сэриитин кыттыылааҕа, биллиилээх снайпер Иван Николаевич Кульбертинов төрөөбүтэ 105 сылын туолар. Кыайыы күнүн көрсө биир дойдулаахтара, “Ньургун” уолаттар ансаамбылларын толорууларыгар Иван Кульбертинов туһунан ырыаны истиҥ.

edersaas.ru

Ырыаны өссө 2009 сыллаахха суруйбут. Бу устуоруйатын ааптар, Өлүөхүмэ улууһун култуураҕа управлениетын начаалынньыгын солбуйааччы Мария Ларионова:

«Өлүөхүмэ эрэллэрэ” диэн уолаттарга аналлаах улуустааҕы бырайыакка (ааптар Лавернова Р.Е.) кытыннараары, 2004 сыллаахха Кыыллаахха (Өлүөхүмэ улууһа) уһуйаан оҕолорун түмэн “Ньургун” уолаттар ансаамбылларын тэрийбитим. Оҕоҕо сөптөөх репертуары булар уустуктардаах, онон бэйэм суруйарым.

2010 сыллаахха Кыайыы 65 сылын бэлиэтиэхтээх этибит. Онно анаан 2008 сыллаахха кыайыы үбүлүөйүгэр анаан бэлэмнээбитим. Тылларын алҕас булбутум. Степан Дадаскинов, Семен Амбросьев “Аатырбыт снайпер Иван Кульбертинов” диэн 2005 сыллаахха тахсыбыт кинигэлэрин бибилэтиэкэҕэ ааҕа олорон булан ылбытым. Көрөөт да, тута сөбүлээбитим. Оҕолорго ырыа оҥорон көрүөххэ диэн толкуйдаабытым. Биир дьиктитэ диэн, ырыаны үксүн гитараҕа таһаарабын. Оттон бу хоһоону ааҕааппын кытта матыыба тута бэйэтэ тахсан кэлбитэ, гитараҕа чочуйан эрэ биэрбитим. Клипкэ Филипп Ларионов, Саша Кузьмин, Дима Егомин, Коля Худаев, Владик Кузьмин, Егор Торговкин, Андриан Корнилов, Проня Егомин уһуллубуттара. Оператор — Илья Борисов, — диэн ырыа суруллубут, уһуллубут устуоруйатын кэпсиир.

Ити ыллаабыт уолаттар билигин номнуо улахан дьон, үөрэҕи бүтэрдилэр, сорохтор аармыйаттан кэлбиттэр, үлэһиттэр, ыал буолбуттар. Мария Дмитриевна бу уолаттары түмэн ырыаларын хатылатан көрөр бүччүм, кимиэхэ даҕаны быктара илик баҕа санаалааҕын этэр. Дьиҥэр, оччолорго ыллаабыт ырыаларын хатылаан саҥаттан уһуллан, килиип оҥордоллор ураты көстүү, умнуллубат устуоруйа буолуох этэ! “Бу уонтан тахса сыл тухары тус бэйэм кэтээн көрүүбүнэн, айар үлэнэн дьарыктаммыт, култуура эйгэтигэр сыстыбыт оҕолор түмсүүлээх, үөрэхтэригэр да, олохторугар даҕаны ситиһиилээх буолаллар, өрүү үтүөҕэ-кэрэҕэ талаһаллар эбит. “Өлүөхүмэ эрэллэрэ” бырайыакка кыттыбыт оҕолор үгүстэрэ улууска, нэһилиэккэ бас-көс дуоһунастарга үлэлииллэр”, — диэн Мария Ларионова үөрэр.

Бүгүҥҥү эйэлээх, көҥүл олох, күөх халлаан туһугар турууласпыт, сырдык тыыннара быстыбыт бэтэрээннэрбитин умнумуоҕуҥ, өрүү өйдүү-саныы сылдьыаҕыҥ!

 

Людмила ПОПОВА, “Саха сирэ” хаһыат, edersaas.ru

0
0
Telegram Whatsapp