Кыайыы волонтердара быйыл, Кыайыы 75 үбүлүөйдээх сылынан, сүүрбэ тыһыынчаттан тахса Георгиевскай лиэнтэни түҥэтэллэр.
edersaas.ru
Быйыл барыта сүүрбэттэн тахса Георгиевскай лиэнтэ дьоҥҥо-сэргэҕэ түҥэтиллиэхтээх. Маныаха бу улаханнык астынан, долгуйан туран иилинэр лиэнтэлэрбит Дьокуускайга атыы-эргиэн туочукаларыгар ыам ыйын төрдүс күнүттэн туттарыллан, дьоҥҥо-сэргэҕэ түҥэтиллэ тураллар. Биһиги ол туһунан бу иннинэ эмиэ суруйан, санатан, хантан ылыахха сөптөөҕүн биллэрэн, иһитиннэрэн турабыт.
Маны сэргэ, бу күннэргэ дьиэлэригэр хааччахтанан олорор аҕам саастаахтарга волонтердар астарын-үөллэрин кытары бу лиэнтэлэри дьиэлэригэр илдьэн биэрэллэр. Бүгүҥҥү туругунан уон тыһыынча лиэнтэ дьоҥҥо-сэргэҕэ соһуччу бэлэх буолан туттарыллыбыт.
Маныаха санатан эттэххэ, бу кэрэхсэбиллээх аахсыйаҕа онлайнынан эмиэ кыттыһыахха сөп. Сэргээбиттэр социальнай тиһиктэринэн (инстаграм, вконтакте, фейсбук) киирэн, бу аахсыйаҕа кыттарга «Георгиевскай лиэнтэ диэн….» диэн саҕалааҥҥыт бэйэҕит үөрүүгүтүн үллэстэҕит, эҕэрдэҕитин этэҕит. Ону видеоҕа устаҕыт. Итиэннэ хештегтээх видеоҕытын #ГеоргиевскаяЛенточкаЯкутия и #ЛучшеДома диэҥҥэ угаҕыт. Бу онлайн-аахсыйаҕа улуустартан, сүүстэн тахса киһи, ыччат уопсастыбаннай түмсүүлэриттэн, улуустартан, ыччат лиидэрдэрэ, түмсүүлэр чилиэннэрэ, оскуола үөрэнээччилэрэ, уопсастыбаннай хамсааһыҥҥа көхтөөх дьон кытыннылар.
Маны сэргэ, «Кыайыы волонтердара» инстаграмҥа Skill Cup үөрэтэр платформаҕа бэртээхэй анал куурус арыллыбытын өссө төгүл санатабыт. Манна Кыайыы бэлиэтин, Георгиевскай лиэнтэни хайа өртүгэр иилинэри, уордьаннаах биллэр-көстөр дьон туһунан, онтон да атын бэрт элбэх интэриэһинэйи, киһини сэргэхситэри, сонуну ааҕыаххыт, билиигитин-көрүүгүтүн хаҥатыныаххыт.
Сардаана Баснаева, «Саха сирэ» хаһыат, edersaas.ru