Ыам ыйын 9 күнүгэр Арассыыйа үрдүнэн “Окно Победы” диэн ырыа аахсыйата ыытыллыаҕа.
edersaas.ru
Аахсыйа Арассыыйа култууратын министиэристибэтин өйөбүлүнэн ыытыллар. Бу тэрээһиҥҥэ Саха сирин профессиональнай мусукааннара уонна муусуканы таптааччылара кыттыыны ылыахтара.
Аахсыйаҕа кыттааччылар Давид Тухманов «День победы» ырыатын дьиэлэригэр олорон, балкоҥҥа тахсан биитэр түннүктэрин таһыгар туран ыллыахтаахтар. Аахсыйа күнүс 12.00 чаастан саҕаланар. Кыттааччылар ырыаларын видеоҕа устан социальнай ситимнэргэ #окнопобеды диэн хэштегтаах таһаарыахтаахтар. Бу аахсыйа В. Д. Поленов аатынан Арассыыйа национальнай муусукатын уонна норуот айымньытын дьиэтин өйөөһүнүнэн ыытыллар.
“Саха сиригэр “День Победы” ырыа муусукатын Филармония духовой оркестра оонньуурун устубуттара. Билигин муусуканы Евгений Тазетдинов таҥа сылдьар” — диэн өрөспүүбүлүкэ профессиональнай искусствотын уонна духуобунай сайдыытын отдела иһитиннэрэр.
Муусука Үрдүкү оскуолатын духуобунай оркестра эмиэ аахсыйаҕа кыттар былааннааҕа биллэр, оҕолор үгүстэрэ дьиэлэрин иһиттэн бэйэлэрин партияларын суруйар кыахтаахтар. Ону сэргэ аахсыйаҕа муусука колледжын духовой оркестра уонна Үҥкүү тыйаатырын национальнай оркестра кыттара былааннанар.
edersaas.ru