Ыам ыйын 9 күнүгэр тэрээһиннэр куйаар ситиминэн, онлайн киэбинэн ыытыллыахтара.
Өрөспүүбүлүкэ култуураҕа тэрилтэлэрэ Улуу Кыайыы 76 сылын көрсө киэҥ бырагырааманы бэлэмнээтилэр. Испэктээктэртэн уонна быыстапкалартан ураты тэрээһиннэр онлайнынан ыытыллаллар. Маннык ньыманан ыытыы бэтэрээннэр кыттыылаах тэрилтэлэргэ хайаан да тутуһуллуохтааҕын туһунан СӨ Култуура5а уонна духуобунай сайдыыга министиэристибэтин пресс-киинэ иһитиннэрэр.
Үүнэр көлүөнэ тыйаатыра «Реликвии военных лет» быыстапканы уонна «Өрүү тыыннаахтар», «Зоя» испэктээктэри бэлэмнээтэ. Эстрада тыйаатыра «Это не только их война» тифлоиспэктээги былаанныыр. Нуучча академическай драматическай тыйаатыра «Два берега одной победы» испэктээги көрдөрүө.
«Рядовые» премьераны Мииринэй тыйаатыра көрөөччүлэргэ бэлэхтиэ. Ньурба тыйаатырыгар «Мария — солдат Победы» испэктээк туруоруллар. Саха академическай драматическай тыйаатыра ыам ыйын 9 күнүгэр Д.Наумов айымньытынан, режиссер Руслан Тараховскай туруоруутугар «Сандаарар сарыал саллааттара» испэктээги бар дьонноругар бэлэх уунуо. Испэктээк 15:00 чаастан саҕаланар. Киириитэ босхо.
Түмэллэр эмиэ ураты, сонун тэрээһиннэригэр ыҥыраллар. Е.Ярославскай аатынан түмэл «Кыайыыга сирдээбит ырыалар» уонна «Буорах сыттаах суруктар» онлайн-тэрээһинигэр ыалдьыттыры ыҥырар. Эмиэ маннык ньыманан «Арассыыйа — мин устуоруйам» түмэлгэ «Биһиги Кыайыыбыт» диэн Саха сирин норуодунай артыыһа Владимир Заболоцкай кэнсиэрэ буоларын иһитиннэрэллэр. Түмэл паарката, маны сэргэ, «Кыайыы туһугар» уонна «Өйдүүбүт» мультимедийнай быыстапкалардаах.
Национальнай бибилэтиэкэ өрүү да буоларын курдук, ааҕааччыларыгар эмиэ болҕомтону тардар бэртээхэй тэрээһини оҥорор. Ол курдук, «В сердцах и книгах память о войне…» виртуальнай быыстапканы көрүҥ диэн иһитиннэрэллэр. Саха сирин норуоттарын музыкатын уонна фольклорун түмэлэ «Кыайыы ырыаһыта: Александр Самсонов олоҕо уонна айар үлэтэ» быыстапканы бэлэмнээтэ. П.А.Ойуунускай аатынан литература түмэлэ «Саха национальнай байыаннай оскуолатын устуоруйатыттан» быыстапката сэҥээриини ылыаҕар саарбахтаабаппыт.
Өрөспүүбүлүкэ тыйаатырдарын артыыстара ырыа-тойук, үҥкүү-битии, хомоҕой хоһоон бэлэмнээтилэр уонна ону бырааһынньык күн бар дьонноругар бэлэх уунуохтара. Былырыыҥҥы курдук, «Тиэргэнинэн ыллыыбыт» Арассыыйатааҕы аахсыйа иитинэн, ытык кырдьаҕастары, бэтэрээннэри ис сүрэхтэриттэн иэйэн, долгуйан туран эҕэрдэлиэхтэрэ. Улуу Кыайыыга аналлаах ырыаны-тойугу, эҕэрдэлэрин Судаарыстыбаннай филармония, Опера уонна балет тыйаатыра, эстрада тыйаатыра уонна «Туймаада» ансаамбыл кыһаллан бэлэмнээтилэр.
+1
+1
+1
+1
+1
+1
+1