Арассыыйаҕа биллэриллибит Үтүө дьулуур сылыгар Таатта улууһа көхтөөхтүк кыттар.
Улууска ыытыллар «1000 үтүө дьыала» хамсааһын чэрчитинэн Уолба нэһилиэгин кэнчээри ыччата элбэх үлэни-хамнаһы тэрийдэ. Нэһилиэк кулуубун дириэктэрэ Анастасия Боппосова ыччаттар уонна оскуола үөрэнээччилэрэ кырдьаҕастарыгар көмөлөһөргө куруук бэлэмнэрин киэн тутта этэр.
—Биһиэхэ ыччаттарбыт үлэҕэ-хамнаска куруук көхтөөхтөр. Кинилэр үтүө холобурдарын батыһан, оскуола оҕолоро эмиэ куруук үөрэ-көтө туох баар тэрээһиҥҥэ, үөрэххэ-билиигэ инники күөҥҥэ сылдьаллар. Саас ахсын үгэс курдук күөлбүтүн, ойбон таһын ыраастаабытынан барабыт. Сир кууруута нэһилиэкпит иһин өрө тардабыт. Бу аахсыйаны Саргылана Рахлеева, Ольга Кусатова салайааччылардаах «Чэгиэн» экологтар кулууптара нэһилиэнньэҕэ эрдэттэн ыҥырыы таһааран, иһитиннэрэн тэрийэр. Онон үлэ көхтөөхтүк барар. Күһүн уонна саас оскуола тэлгэһэтин ыраастааһын үлэтэ бэйэтэ туспа үөрүүлээх тэрээһин курдук ыытыллар. Күһүн балаҕан ыйыгар «Туос» диэн хамсааһыҥҥа оскуола эр дьоно уонна уолаттар бука бары тыаҕа эргэрэн, эмэҕирэн сууллубут хатыҥ туоһун хомуйа, айылҕаны ыраастыы тахсаллар. Онно хомуйбут туостарын нэһилиэк аҕам саастаахтарыгар уот саҕаһатыгар диэн түҥэтэллэр. Онон кырдьаҕастарбыт барахсаттар бу тэрээһини эмиэ үөрэ, долгуйа күүтэллэр. Маны сэргэ, оскуола үөрэнээччилэрэ учууталларын уонна билэр-көрөр дьон сүбэтинэн, ыйыытынан-кэрдиитинэн анаан тахсаннар туос хастыыллар. Онтуларын Моҕол ураһаны тигэр нэһилиэкпит уран тарбахтаахтарын түмсүүтүгэр биэрэн көмөлөһөллөр. Итинник хабааннаах үлэлэри тэрийиигэ тустаах, эппиэтинэстээх салайааччылар оҕолорго, кэнчээри ыччакка тулалыыр эйгэни харыстааһын, өбүгэ үлэтин-хамнаһын, итэҕэлин, сиэрин-туомун туһунан кэпсии-ипсии, өйдөтө сылдьаллара улахан туһалаах.
Онтон бу күннэргэ кулууп художественнай салайаачыта Виктория Семенова сүбэтинэн оскуола алын уонна орто сүһүөх кылааһын үөрэнээччилэрэ мустан, Георгиевскай лиэнтэлэри оҥоро сылдьаллар. Оҕолор бу лиэнтэлэри Кыайыы күнүгэр ытык-мааны кырдьаҕастарга түҥэтиэхтэрэ, кинилэргэ истиҥ эҕэрдэлэрин тиэрдиэхтэрэ. — диир кини.
Биһиги корр., «Саха сирэ» хаһыат, edersaas.ru