Ил Дархан Айсен Николаев бүгүн улуус дьаһалталарын баһылыктарыгар ыыппыт селекторнай мунньаҕар, бырааһынньык күннэригэр дьиэҕэ олорор эрэсиими кытаанахтык тутуһууну хонтуруолга ылар туһунан соругу туруорда.
edersaas.ru
—— Улуу Кыайыы 75 сылынан ыам ыйын 9 күнүгэр бэлиэтэниэхтээх бырааһынньык онлайн-эрэсииминэн ыытыллыаҕа. Дьон-сэргэ мустубатаҕын да иһин, Кыайыы бырааһынньыгын хайаан да бэлиэтиэхпит. Бүгүҥҥү сорук — коронавирус сыстыганнаах дьаҥыттан босхолонуу, — диэн бэлиэтээтэ Айсен Николаев.
Бырааһынньык иннинэ бары улуустарга мемориальнай комплекстары, искибиэрдэри, болуоссаттары, пааматынньыктары уонна өйдөбүнньүк бэлиэлэри дезинфекциялааһын ыытыллыахтааҕын туһунан иһитиннэрдэ. Бэтэрээннэри эҕэрдэлиир кэмҥэ чугастык хантаахтаһартан сэрэнэри бэлиэтээн ыйда.
Ил Дархан балаһыанньа олус уустугурбутун эттэ. Өскөтүн, ааспыт нэдиэлэҕэ өрөспүүбүлүкэтээҕи харах балыыһатыгар элбэх киһи сыстыганнаах дьаҥҥа сутуллубут буоллаҕына, бу нэдиэлэҕэ федеральнай университет устудьуоннара олорор уопсайдарыгар 30 ыччакка коронавирус дьаҥын буллулар. Манан сибээстээн, улуустар бары киин балыыһаларыгар санитарнай-эпидемиологическай нуорманы тутуһалларыгар ыҥырда.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Андрей Сорокин түһэриитэ.