Быйыл 100 сааһын бэлиэтээбит «Якутия» хаһыат бирииһигэр Дьокуускайга үгэс буолбут сүүрүүгэ эстэпиэтэҕэ киин куорат үөрэҕин кыһаларын, үлэ кэлэктииптэрин хамаандалара өрүү буоларыныы көхтөөхтүк кытыннылар.
Роман Попов, “Саха сирэ” хаһыат, https://edersaas.ru
1944 сыллаахтан ыытыллар куоталаһыыга 56 хамаандаттан 812 сүүрүүк уон түөрт түһүмэхтээх эстэпиэтэҕэ илин-кэлин түһүстэ.
Орто уонна уопсай сүрүн үөрэхтээһин тэрилтэлэрин ортотугар бу сырыыга 21 №-дээх оскуола бастакы хамаандата (тренер Евгения Паденко) кыайыылааҕынан буолла. Л.А. Колосова аатынан 33 №-дээх оскуола быһыйдара иккис миэстэнэн дуоһуйарга күһэлиннилэр. .
Үрдүк үөрэх кыһаларын, үлэ кэлэктииптэрин ортотугар университет физическэй култуураҕа уонна спорка институтун бастакы хамаандата (тренердэрэ Артур Феофанов, Конон Никифоров, Никита Никифоров) 7 биэрэстэ 800 м уһуннаах сири маҥнайгынан түмүктээтэ.
Үгэс быһыытынан сүүрүүлэр бастакы түһүмэхтэригэр 1 100 м бастаабыт Николай Калачиков (21 №-дээх оскуола) уонна Филипп Собакин (ИФКиС-1) хаһыат эрэдээксийэтин анал бириистэринэн бэлиэтэннилэр. Манна даҕатан эттэххэ, Николай үөрэнээччилэр ортолоругар Арассыыйаҕа бастыыр иһин күрэхтэһии үрүҥ көмүс призера, оттон Филипп Бүттүүн Арассыыйатааҕы турнир кыайыылаахтарынан буолаллар.
Бөлөхтөрүгэр кыайыылаах уонна миэстэлэспит хамаандалар Дьокуускай дьаһалтатын туруорбут кубоктарынан, грамоталарынан, мэтээллэринэн, эрэдээксийэ харчынан бириистэринэн, минньигэс тортарынан биһирэннилэр.
Роман Попов, “Саха сирэ” хаһыат, https://edersaas.ru
Ааптар хаартыскаҕа түһэриитэ.
“Якутия” хаһыат бирииһигэр сүүрүүгэ эстэпиэтэ кыайыылаахтара
2017 сыл ыам ыйын 9 күнэ. Дьокуускай куорат.
I бөлөххө: 1. 21 №-дээх оскуола 2. 33 №-дээх оскуола 3. 23 №-дээх оскуола
II бөлөххө: 1. Дьокуускайдааҕы национальнай гимназия 2. Өрөспүүбүлүкэтээҕи лицей-интернат 3. “Айыы кыһата” гимназия
III бөлөххө: 1. 6 №-дээх оскуола 2. 8 №-дээх оскуола
IV бөлөххө: 1. Тыа хаһаайыстыбатын техникума 2. П.П.Романов аатынан художественнай училище 3. Медицинскэй колледж
VI бөлөххө: 1. ХИФУ үлэһиттэрин хамаандата 2. Киин куорат үөрэҕириитин үлэһиттэрин идэлээх сойуустарын хамаандата 3. Ыксаллаах быһыыга-майгыга сулууспа хамаандата
VII бөлөххө: 1. ИФКиС-1 2. Горнай институт 3. ИФКиС -2