Таатта улууһун Дьохсоҕон нэһилиэгин М.А.Петров аатынан бибилэтиэкэтэ Улуу Кыайыы күнүнэн сыллата бэртээхэй тэрээһин тэрийэр үгэстээх. Быйыл, Кыайыы 75 сылынан, кинигэ долбуура тэриллибит.
edersaas.ru
Сиһилии бибилэтиэкэ сэбиэдиссэйэ Галина Другина кэпсиир:
—Сыллата маннык аахсыйа ыытабыт. Ону сэргэ, быыстапка, күрэс арааһын, билиини-көрүүнү хаҥатар викториналары, о.д.а. тэрийээччибит. Быйыл өрөспүүбүлүкэҕэ коронавирус дьаҥынан буола турар быһыыны-майгыны учуоттааммыт, кулун тутартан кинигэ долбуурун тэрийдибит. Ол эбэтэр, бу аахсыйаҕа кыттыһааччылар дьон-сэргэ ааҕарыгар анаан бибилэтиэкэҕэ кинигэ бэлэхтэрин волонтердарынан ыыталлар.
Аахсыйаҕа нэһилиэк олохтоохторуттан бастакынан Михаил, Светлана Архиповтар «Саллааттар суруктара» кинигэни бэлэхтээбиттэрэ. Кинилэр сыл ахсын көхтөөхтүк кытталлар. Бастыҥ ааҕааччыларбыт бэлэхтэрэ эгэлгэ. Ол курдук, Мария Макарова «Бэтэрээннэр ахтыылара» кинигэни бэлэхтээтэ. Дмитрий, Татьяна Малышевтар соһуччу бэлэх оҥорон, 110 кинигэни биэрдилэр. Манна уон кинигэҕэ уоттаах сэрии алдьархайын туһунан кэпсэнэр. «Өлбүт Дьоруойдар этэллэр» , биир дойдулаахпыт И.В.Кузьмин туһунан бастакы кинигэ, «Уоттаах сыллар суруктара», уо.д.а. Бэтэрээн учуутал Светлана Егорова ааҕааччы киэҥ араҥатыгар ананар нууччалыы тылынан тахсыбыт бэртээхэй кинигэлэри аҕалла. Учуутал Галина Давыдова оскуола үрдүкү кылааһын оҕолоро умсугуйан аахтынар диэн нуучча, омук классиктарын айымньыларын, барыта 75 кинигэни туттарда. Балар ортолоругар биһиги бибилэтиэкэбитигэр суох И.В.Сталин туһунан кинигэ баар. Түгэнинэн туһанан эттэххэ, Галина Константиновна быйыл бибилэтиэкэбит өрөспүүбүлүкэҕэ тэрийбит аҕа уонна уол күннэригэр аналлаах хаартысканан күрэскэ, дьүөгэлэрин кытта кыайыылаахха анаан бириис туруорбуттара. Онон кинилэргэ улахан махталбытын тиэрдэбит. Талааннаах худуоһунньук Елена Харайданова 25 кинигэ арааһын бэлэх уунна. Елена Ивановна туттарбыт кинигэлэригэр остуоруйалар, доруобуйаны көрүнүүгэ, сынньалаҥҥа аналлаахтар элбэхтэр. Үөрүүбүтүн үксэтиһэн, бу күннэргэ Дьокуускай куораттан биир дойдулаахпыт Роман, Прасковья Даниловтар дьиэ кэргэттэрэ «Умнуллубат Улуу Кыайыы. Саха сирэ Аҕа дойду улуу сэриитин сылларыгар» диэн кинигэни ыыппыттарын туттубут.
Ити курдук, билии биһигин сыаналаан, дьоммут-сэргэбит бибилэтиэкэбитигэр суох сонун кинигэлэри сылын аайы бэлэхтээн, пуондабытын хаҥатыһалларыттан олус үөрэбит уонна улахан махталбытын тиэрдэбит.
Галина Николаевна бу бэлэхтэммит кинигэлэри уларсаары ааҕааччылар суруппуттарын, уочарат номнуо ырааппытын эттэ.
Сардаана Баснаева, «Саха сирэ» хаһыат, edersaas.ru
Хаартыскалар нэһилиэк бибилэтиэкэтин тиксэриилэрэ