Бу күннэргэ Улуу Кыайыы 77 сылын көрсө Тверь, Ржев, Вязьма уонна Брянскай куораттарынан ”Кыайыы факела” сүүрүү кыттааччылара ааһыахтара.
Аҕа дойду сэриитин саҕана улахан хаан тохтуулаах кыргыһыылар буолбут куораттарынан сүүрүү кыттыылаахтара Дьокуускайтан муус устар 28 күнүгэр аттаммыттара. Тэрээһиҥҥэ кыттар кыргыттар хамаандаларын СӨ физическкэй култууратын уонна спордун үтүөлээх үлэһитэ, экстремал-сүүрээччи Дмитрий Горохов салайар.
700 км сүүрэр хамаандаҕа Лира Давыдова, Валентина Доргуева, Виктория Баишева, Марияанна Васильева, Александра Митина, Яна Егорова уонна Анна Колесова бааллар.
Кыргыттар бары уһун дистанцияҕа сүүрэр уопуттаахтар чэпчэки атлетика кулууптарыгар дьарыктаналлар, чөл олох пропагандистара.
Хамаанда кыттыылаахтара Саха сириттэн Тверь, Ржев, Вязьма уонна Брянскай куораттары босхолооһуҥҥа кыттыбыт саха салааттарын кэриэстээн устуоруйа ытык сирдэринэн сылдьаллар.
Бэҕэһээ, ыам ыйын 2 күнүгэр, Тверь куораттан IV ”Кыайыы факела” дьахталлар чэчпчэки атлетикаҕа дьахталлар сүүрүлэрэ саҕаланна.
Тэрээһин Саха АССР төрүттэммитэ 100, Улуу Кыайыы — 77, сылларыгар, Саха сиригэр Ийэ сылларыгар уонна Курскай кыргыһыытын 80 сылыгар ананар. Хамаанданы Ил Түмэн ыччат, физическэй култуура уонна спорт дьыалаларыгар сис кэмитиэтэ, өрөспүүбүлүкэтээҕи бэтэрээннэр сэбиэттэрэ, “Победа” социальнай көмүскэл ресурснай киинэ, Москва куоракка РФ Бэрэсидьиэнин иһинэн үлэлиир СӨ Бастайааннай Бэрэстэбиитэлэстибэтэ өйүүллэр.
Тэрээһин кыттааччылара муус устар 30 күнүгэр Москваҕа Биллибэт саллаат уҥуоҕар, ыам ыйын 1 күнүгэр «Врата Победы» мемориал-стелаҕа тыыннаах сибэкки дьөрбөтүн уурбуттара. Улуу Кыайыыга анаммыт сүүрүүнү ыам ыйын 7 күнүгэр түмүктүөхтэрэ.
Елена ПОТОЦКАЯ, “Саха сирэ” хаһыат, edersaas.ru