Кыайыы болуоссата дьонунан толору

Ааптар: 
Бөлөххө киир:

Бу күннэргэ Дьокуускай куоракка ыам ыйынааҕы бырааһынньыктар кэннилэриттэн, коронавирус дьаҥа өрө туран кэбистэ.

edersaas.ru

Ол курдук, киин куоракка күн аайы коронавируһунан ыалдьыбыт дьон ахсаана элбии турар.

18 чаастааҕы «Якутия 24» сонуннарыгар суруналыыс Сергей Мехедов Кыайыы болуоссатыгар тиийэн, суһал репортаж оҥордо.

— Бу күннэргэ төһө эмэ дьиэҕэ олоруу эрэсиимэ биллэриллибитин үрдүнэн, болуоссакка оҕо-аймах, улахан дьон толору. Мааската суохтар элбэхтэр. Таһырдьа +25 кыраадыс итии. Дьон туох да кыһалҕата суох күүлэйдии сылдьар. Саатар бэйэ-бэйэлэриттэн тэйиччи дистанцияны тутуспаттар. Оҕо наһаа элбэх. Дьиҥэр, кэнники чахчынан, 200-чэкэ оҕо сыстыганнаах дьаҥынан сутуллубута биллэр. Сорох чахчынан 30% «самоизоляцияҕа» олорор дьон ирдэбили тутуспакка, таһырдьа көҥүл тахсаллара кытта баар, — диэн бэлиэтиир суруналыыс.

Сонуннарга көстүбүтүнэн, саастаах дьон эмиэ холкутук дьаарбайа сылдьаллар.

Кыра оҕолоох дьону, ыччаты киһи этэ да барбат. Дьон олох холку.

Быһата, туох да буолбатаҕын курдук, дьаарбайыы, салгыҥҥа көҥүл көччүйүү! Абата баар, ким эрэ үс ыйы быһа дьиэтиттэн тахсыбакка, ирдэбили тутуһар, ким эрэ туохха да наадыйбакка, ыарыыны тарҕатыыга бары күүһүнэн «көмөлөһөр».

Тыаҕа оскуоланы бүтэрбит оҕолорун кытта эмиэ күүлэйдии тахсыы, бырааһынньыктааһын — ким да ирдэбилгэ наадыйбат. Мантан киэһэ Тиһэх чуорааны бары аймаҕынан  хайдах бэлиэтии сылдьаллара тапталлаах инстаграммытын толоруоҕа. Хаһан өйдөнөр дьонуй бу? Инстаграмынан чуо булан, итинник ирдэбили кэһэр дьону ыстарааптыыр уолдьаспата дуо? Дьиэҕэ олорор дьон сөпкө айманар: «Тоҕо ким эрэ санаата да, тыаҕа, уулуссаҕа тахсан күүлэйдиэхтээҕий? Ким эрэ дьиэттэн тахсыбакка үс ыйы быһа олоруохтааҕый?»

«Бүгүҥҥүттэн ыла полиция үлэһиттэрэ уулуссаларга тахсан, дьиэҕэ олоруу эрэсиимин кэспит дьону ыстарааптыахтара» диэн сонуннарга иһитиннэрдилэр. Оннук миэрэ ылыллар кэмэ кэллэ.

Елена ПОТОЦКАЯ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0