Таатта улууһугар, Чөркөөххө, Улуу Кыайыы 75 сылын көрсө субуотунньук ааттааҕа ыытылынна. Маннык көхтөөх үлэни улуус дьокутааттара А.П.Семенов, Г.Г.Вырдылин көҕүлээтилэр, ону улуус, нэһилиэк дьаһалталара өйөөтүлэр.
—Өтөрүнэн буолбатах улахан субуотунньук ыытылынна. Дьон-сэргэ онтон олус астынна, үөрдэ. Манна оҕолуун, улахан дьоннуун уопсайа 100-кэ чугаһыыр киһи кытынна, 8 тиэхиньикэ үлэлээтэ. Бу күн ордук эр дьон хото тахсыбыттара, кинилэр сомоҕолоһуулаахтарын, төрөөбүт дойдуларын туһугар туох да ыарахан үлэттэн чаҕыйбаттарын уонна аҕалар, эр дьон оруола үрдүктүк тутулларын, улахан болҕомтону ыларын көрдөрдө.
Бачча элбэх киһи үөрэ-көтө кыттыспыта улахан күүс буоллаҕа. Нэһилиэк киин уулуссата өрө тардылынна, тула бэрээдэк, ыраас киһини эрэ үөрдэр, манньытар көстүүлэннэ. Кыайыы болуоссатын, «Албан аат» скверин күрүөлэрэ кылбаччы кырааскаланна, сэргэх көстүүнү биэрдэ. Эргэ тутуу оннуларын түөрэ ыраастаан, тиэргэннэр тастарын хомуйан, суолу грейдердээн Чөркөөх, бэл, тыынар салгынныын чэбдигирдэ, көстөр көстүүлүүн сырдаата.
Түгэнинэн туһанан, субуотунньукка минньигэс аһынан дьону тото-хана аһаппыт повардарбытыгар, үлэҕэ көхтөөхтүк кыттыбыт Чөркөөх бары олохтоохторугар, тэрилтэлэр салайааччыларыгар, кэлэктииптэригэр, «Утум» түмсүүгэ, оҕо саадын үлэһиттэригэр, улуус баһылыгар М.М.Соровка, Чөркөөх нэһилиэгин баһылыгар М.Г.Аржаковка, «Тааттаавтодор» ААУо генеральнай дириэктэригэр И.И.Бочониҥҥа, «Дорстрой» салайааччытыгар, улуус дьокутаатыгар Н.И.Унаровка, «Прогресс» ПУо дириэктэригэр Н.Н.Васильеваҕа, уо.д.а. ис сүрэхпититтэн махтанабыт, — диэн кэпсээтэ улуус култуураҕа управлениетын салайааччыта Гаврил Вырдылин.
Чөркөөхтөр нэһилиэктэрин өрө тардыыга бачыым көтөхтүлэр. Атын нэһилиэктэр маннык хамсааһыннары тэрийэллэригэр ыҥырдылар.
Сардаана БАСНАЕВА, «Саха сирэ» хаһыат, edersaas.ru