Кыайыы 75 сылыгар аналлаах сахалыы олбох тигиитигэр кыттыһабыт
Кулун тутар бастакы күннэригэр күөх Ньурба сирин далбар хотуттара Кыайыы 75 сылыгар анаан сахалыы олбох тигэн кырдьаҕастарбытын, кыайыыны уһансыбыт күндү дьоммутун үөрдүөҕүҥ диэн Сахабыт сирин бары олохтоохторугар ыҥырыы таһаарбыттара.
Ньурба улууһугар ыҥырыыны бастакынан Ньурбатааҕы инбэлииттэр уопсастыбалара өйөөбүтүн, онтон салҕанан оройуон үрдүнэн олбохтор тигиллэ сылдьалларын олус сэргии, сөҕө-махтайа ылыммыппыт. Ыҥырыыны көҕүлээбит дьонтон биир бастыҥнара, далбар хотун мааныта Галина Дмитриевна Федорова саҥа тигэн саҕалыыр дьоҥҥо сүбэ-ама биэрэргэ, ыйытыыларга хоруйдуурга бэлэмин биллэрбитэ. Бу ыҥырыыны өйөөн, биһиги, Өктөмнөөҕү «Күбэйэ» түмсүү далбар хотуттара (салайааччы Миралюба Манчаровна Саморцева) олбохтору тигэргэ быһаарыммыппыт уонна үлэбитин саҕалаабыппыт. Биһиги, дьоллоох олоххо олорор көлүөнэ, хайдах даҕаны маннык сырдык, ис сүрэхтэн тахсыбыт ыҥырыыны болҕомтоҕо ылбакка, аһара көтөрбүт сатаммат курдуга.
Бары билэбит, бэл сэрии ыар сылларыгар, сут-кураан дьылларга ийэлэрбит, эбэлэрбит оҕолоруттан, күннээҕи түбүктэриттэн быыс булан, көмүлүөк оһох иннигэр мустан олорон, түү истээх үтүлүк, кээнчэ, бэргэһэ тигэн фроҥҥа ыыталлара.
Биһиги олбохтору Өктөм нэһилиэгин тыыл бэтэрээннэригэр анаан тиктибит уонна эбии олбохтору угарга суумка тигэн бэлэмнээтибит. Суумкалары экокожаттан тиктибит уонна таһыгар түмсүүбүт эмблематын түһэрэр былааннаахпыт. Маннык тэрээһиҥҥэ кыттыһан, күндү дьоммутугар бэлэх уунарбытыттан наһаа үөрэбит, астынабыт, санаабыт көтөҕүллэр!
Бүгүн Кыайыыны уһансыбыт күндү дьоммутун санаан, дьоллоох олохпутун сыаналаан, айхаллаан, сэрииттэн кэлбэтэх аҕаларбытын, эһэлэрбитин, убайдарбытын кэриэстээн, аттыбытыгар баар ытыктанар дьоммутун үөрдүөҕүҥ диэн ыҥырыыны салҕыы ыытабыт!
“Күбэйэ” түмсүү аатыттан
edersaas.ru саайтка анаан
Лариса АТЛАСОВА суруйда.