Халымаҕа Слепцов Иван Степанович 1913 — 1982 сс. олорбута. Сэбиэскэй-хаһаайыстыбаннай үлэлэргэ үлэлээбитэ. 1968 с. Орто Халыма куоратын бочуоттаах гражданина буолбута.
Кини чахчы күүстээх, атаҕынай быһый киһи этэ. Онтун биллэрбэт буола, кистии сатыыра. Арай биирдэ Үөһээ Таала диэн, аатын курдук үрдүк сиргэ турар, Родчево факториятыгар күүһүн биллэрбит…
Борохуот баарсатыттан таһаҕас таһа сылдьыбыттар. Оччолорго кууллаах бурдук 50-тан тахса киилэ ыйааһыннааҕа. Ону кини түөрт куулу биирдэ сүгэн-көтөҕөн таһаарбыт уонна ыскылаакка илдьэн түһэртээбит. Икки куулу көхсүгэр сүкпүтэ, иккини биир-биир кыбынан баран, тыраабынан далаһалаан тахсыбыта дииллэр.
1943 сыллаахха саас, халаан уутун саҕана. Оһоруоха диэн бэрэбиэстэнэр үрэххэ хаайтарбыппыт. Үрэҕи туоруурга аналлаах болуот уонна тыы үрэх уҥуор тураллара. Сүгэбит суоҕа. Бөһүөлэк түөрт көстөөх сиргэ баара. Үрэхпит уонтан тахса миэтэрэ кэтиттээҕэ, сүрдээх дириҥ этэ.
Хайдах буоларбытын киһибиттэн ыйыппытым. Иван Степанович саҥарбатаҕа. Бэрт холкутук туттан-хаптан тыа иһигэр киирбитэ. Уһаабатаҕа — балачча суон уонна уһун тиити санныгар сүгэн тахсыбыта. Үрэх синньиир сиригэр илдьэн, тиитин туора түһэр гына анньыбыта. Далаһа бэлэм буола охсубута. Тахсан, тыын ылан таһаҕаспытын таһаарбыппыт, аттарбытын харбатан туораппыппыт. Иван тиити төбөтүттэн өрө көтөҕөн туора аспыта. Тииппит уста турбута.
Мин чахчы дьиктиргээбит, сөхпүт көрүҥнээҕим эбитэ буолуо — Иван Степанович балачча өр одуулаан турбута. Итиэннэ: «Эн бу курдук туораабыппытын кимиэхэ да кэпсээн оҥостума. Араастаан эбэн кэпсиэхтэрэ. Ону мин сөбүлээбэппин», — диэбитэ. Мин «ээх» диэбитим уонна түөрт уонтан тахса сыл буолан баран, бу кэпсээтим…
Иван Степанович Слепцов үтүөкэннээх үлэһит, сэмэй киһи этэ.
Дмитрий Колесов
«Оллой кулуба уонна Кэдээк ойуун» (үһүйээннэр, номохтор, кэпсээннэр) кинигэтиттэн.
«Бичик» кинигэ кыһата, 2013 с.