Тохсунньу 9 күнүгэр Саха сирин киин куоратыгар 47 кыраадыс түһэн турдаҕына, куорат устун сүүрэ сылдьар дьону көрөн, үгүс киһи “Ыччыы-ычча-аа!..” – диэн соһуйда.
edersaas.ru
Кырыа кыһын, саамай тымныы түһэр кэмигэр “Тымныы оройо – Верхоянскай” сүүрүүнү марафонец Дмитрий Горохов номнуо тохсус сылын ыытар. Сүүрүүнү көҕүлээччи Дмитрий Горохов этэринэн, маннык тэрээһининэн кини төрөөбүт дойдута Үөһээ Дьааҥы тымныы чыпчаала буоларын кэрэһилиир. Биллэрин курдук, Дмитрий Николаевич бу кэмҥэ сүүрүүнэн эрэ муҥурдаммат. Чопчу тымныы түһэр кэмнэригэр нэһилиэктэргэ сылдьан чэбдигирдэр хамсаныылары уонна эрчиллиилэри ыытар. Киһи ханнык да бэйэлээх тымныыларга улугуран хаалбакка, элбэхтик хамсана, чэбдигирэ, сибиэһэй салгынынан тыына сылдьарыгар биир санаалаахтарыныын холобур көрдөрөр.
Тохсунньу томороон тымныытыгар ыытыллыбыт сүүрүүгэ географическай наука кандидата Ярослав Торговкин, СӨ чэпчэки атлетикаҕа спорт маастара Олег Попов, хайыһарга спорт маастара Юрий Филиппов, элбэх күрэхтэһии кыайыылааҕа уонна призера Яков Винокуров, “Сулус” фитнес салайааччыта Ульяна Окорокова, сүүрүктэр Гаврил Филиппов, Нина Филиппова уо.д.а. кытыннылар. Ону сэргэ тымныы оройугар сүүрүүнү “Азия оҕолоро” аан дойдутааҕы спортивнай оонньуулар уоттарын илдьэ сүүрүүгэ кыттыбыт, Эльбрус уо.д.а. хайаларга тахсыбыт альпинистка Анна Яковлева, Саха сирин спортивнай оонньууларын кыттыылааҕа, үгүс оонньуулар кыайыылаахтара уонна призердара Александра Брызгалова, “Дьокуускай-Хаандыга-Үөһээ Дьааҥы-Өймөкөөн-Сусуман» маршрутунан сүүрүү кыттыылааҕа Александр Мэрин куруук өйүүллэр уонна кытталлар. Манна сыһыаран эттэххэ, үөһээ ааттаммыт дьон бары тус үлэлээх, сүүрүүнү дьарык оҥостор дьон.
Надежда ЕГОРОВА, “Саха сирэ” edersaas.ru