Сэтинньи ортотуттан Саха сиригэр бастакы улахан тымныылар түһүүлэрин саҕана, үгэс быһыытынан ыытыллар «Кыһын Саха сириттэн саҕаланар» кыһыҥҥы туризм бэстибээлин өрөспүүбүлүкэ олохтоохторо бары кэтэһэбит.
Кинилэр социальнай тэрилтэлэргэ сылдьан оҕо аймахха Саҥа дьыллааҕы үөрүүнү аҕалыахтара, бырааһынньыктааҕы харыйаларын уматыыга кыттыахтара.
Үгэс буолбут «Саха сирин амтана» гастрономическай бэстибээлгэ Дьокуускай куорат эрэстэрээннэрэ национальнай ас амтаннааҕын амсатыахтара, ааттаах-суоллаах ыалдьыттарга Саха сирин ураты амтанын билиһиннэриэхтэрэ. Бу күннэргэ саха аһын астааччылар күн солото суох сылдьаллар, национальнай ас көрүҥүнэн ыалдьыттары соһутарга түбүгүрэн эрэллэр.
Тымныыттан харыстанар таҥаһы тигээччилэр бэстибээлгэ анаан эмиэ бэлэмнэнэллэр. Сэтинньи 29—ахсынньы 1 күннэригэр «Триумф» спорт киинигэр «Саха сирин кыһыҥҥы таҥаһа» диэн быыстапка-дьаарбаҥка ыытыллыаҕа.
«Саха сиригэр оҥоһулунна» уопсастыбаннай ассоциация тэрийиитинэн өрөспүүбүлүкэ талааннаах дьоно маннык ааттаах улахан быыстапкаҕа кыттаары эмиэ тэринэллэр.
Оттон «Саха сирин бриллианнара» диэн уопсай аатынан айар куттаах дьоммут хаар, муус скульптуралары, көмүс, алмаас күндү таастартан оҥоһуллубут оҥоһуктары көрдөрөөрү, оҕолорбут барахсаттар ырыа-үҥкүү куонкурустарыгар кыттаары, сүүрэллэр-көтөллөр, түбүгүрэллэр.
Быйыл кыһыҥҥы туризм бэстибээлигэр сонун сүүрээннэр киирдилэр. Ол курдук, «Хаардаах дойду куукулатын баала» (куукула оҥорооччулар куонкурустара), «Саха киэргэлин үрүҥ көмүс үйэтэ» (устуоруйаҕа киирбит национальнай киэргэл быыстапката), «Саха моржтара» (чөл олоҕу тарҕатааччылар кулууптарыгар сылдьар дьон муустаах ууга сөтүөлээһиннэрэ), «Үрүҥ көмүс хаҥкы» (фигурнай хаҥкылааһын күрэһэ), Нам улууһугар «Муҥха» ( балыктааһын бэстибээлэ) тэрээһиннэр үгүс киһи болҕомтотун тардыахтара.
Спортивнай тэрээһиннэр быйыл да өрө көтөҕүллүүлээхтик ыытыллалларыгар эрэл улахан. Сүүрүү, ыстаныы, ойуу, хаамыы, тустуу арааһа барыта ыытыллыаҕа.
Кыһыҥҥы туризм быйылгы бэстибээлэ үгэс буолбут «Строганина-2019» тэрээһинэ «Триумф» кииҥҥэ бар дьону күүтэр.
Бэстибээл үгэс быһыытынан ахсынньы 1 күнүгэр 16 ч. — Ленин, 17 ч.— Орджоникидзе болуоссаттарыгар Саҥа дьыллааҕы күөх харыйа уоттарын уматыынан түмүктэниэҕэ.
Бу күн Чысхаан Тымныы Моруос оҕонньорго Кыһын саҕаламмыт бэлиэтин — Тымныы полюһуттан, Өймөкөөнтөн аҕалыллыбыт Тымныы анал бэлиэтин туттарыаҕа.
Дьэ, ол кэнниттэн Моруос оҕонньор бүтүн Арассыыйа устун сылдьан, кыһын кэлбитин биллэрэн, тымныыны тарҕатыаҕа.
Тэрийээччилэр, биллэн турар, кыһыҥҥы бырааһынньык норуокка сэргэхтик, интэриэһинэйдик ааһарыгар кыһаллаллар. Онон Дьокуускай куорат олохтоохторун уонна ыалдьыттарын, өрөспүүблүкэ улуустарыгар олоро дьону-сэргэни: «Сэтинньи 25 күнүттэн ахсынньы 1 күнүгэр диэри ыытыллар өрөспүүбүлүкэтээҕи кыһыҥҥы туризм бэстибээлигэр күҥҥүтүн былааннааҥ. Саҥа дьыллааҕы кэрэ түгэни эрдэттэн бэлэмнэнэн дууһаҕытыгар уһугуннарыҥ!» — диэн ыҥыраллар. Кыһын Саха сириттэн саҕаланар!
Елена ПОТОЦКАЯ, «Саха сирэ» хаһыат, edersaas.ru
Хаартыска: интэриниэттэн уонна ааптар түһэриитэ.