Сүрүн Уопсастыба

«Кыһын Саха сириттэн саҕаланар» бэстибээл ыҥырар

Бүгүҥҥүттэн «Кыһын Саха сириттэн саҕаланар» кыһыҥҥы туризм бэстибээлэ саҕаланна. 

СИА иһитиннэрэринэн, бу суолталаах тэрээһин быйыл 10-с үбүлүөйдээх сыла. Бэстибээл сэтинньи 26 күнүттэн ахсынньы 5 күнүгэр диэри куйаар ситиминэн уонна оффлайн ыытыллыаҕа.

Үбүлүөйдээх тэрээһин сонун сүүрээнэ үгүс. Ол курдук, куорат олохтоохторун уонна ыалдьыттарын аан бастаан ыытыллар «The Snow Queen in Yakutia» арт-шоу, Дьүкээбили түһэрэн дьүһүйүүгэ хаартыска уонна видео  куонкуруһа, саха моржтарын сөтүөҕэ күрэстэрэ, кыһыҥҥы тиэмэҕэ араас маастар-кылаастар, уо д.а. бэрт интэриэһинэй аралдьытар тэрээһиннэр, быыстапкалар күүтэллэр. Бырааһынньык биир сүрүн киэргэлинэн буолбут «Arctic fashion show» муода көрдөрүүтэ «Триумф» спорт киинигэр ахсынньы 2 күнүгэр ыытыллыаҕа. Бу тэрээһини «Саха» НКИХ быһа эпииринэн көрдөрүөҕэ. Дьокуускайга «Муус оҥоһук куората» үс сиринэн — Атласовтар этноуһаайбаларыгар, «Үрдэл» сынньалаҥ пааркатыгар уонна 202 микрооройуоҥҥа аһыллыахтара. Оттон Арассыыйаҕа бастакы харыйаны Тымныы полюһун тымныытын хаһаайына  Чысхаан уотунан сандаардар сиэрэ-туома Дьокуускайга ахсынньы 1 күнүгэр  ыытыллыаҕа.

Бу күннэргэ «Кыһын Саха сириттэн саҕаланар» кыһыҥҥы туризм бэстибээли көрсө Чысхаан «Спутник V» быһыыны туруортарда. Остуоруйа дьоруойа: «Саҥа дьыллааҕы үөрүүлээх тэрээһиннэргэ дьон ортотугар сылдьар буолан, сыстыганнаах дьаҥтан  харыстанарым наада», — диэн бэлиэтээн эттэ.

 

Елена ПОТОЦКАЯ, “Саха сирэ” хаһыат, edersaas.ru

 

Хаартыска – СИА.

0
0
Telegram @edersaas20