Быйыл онус төгүлүн өрөспүүбүлүкэбитигэр ыытыллар «Кыһын Саха сириттэн саҕаланар» бэстибээл сэтинньи 26 күнүттэн ахсынньы 5 күнүгэр диэри онлайн уонна оффлайн киэбинэн ыытыллыаҕа.
«Бу уон сыл иһигэр тэрээһин туризмы, култуураны, успуорду, урбааны холбуур бэстибээлгэ кубулуйда. «Кыһын Саха сириттэн саҕаланар» бэстибээл норуоттар икки ардыларынааҕы таһымнанан, Саха сирин ыалдьыттарга, туристарга киэҥник билиһиннэрэр тэрээһин буолар. Манна сылдьыбыт дьон Саха сирин кыһынын, олоҕун, култууратын билэр», — диэн СӨ Урбааҥҥа, эргиэҥҥэ уонна туризмҥа миниистирэ Ирина Высоких этэр.
Быйылгы бэстибээл бырагырааматыгар «The Snow Queen in Yakutia» арт-шоу, дьүкээбили хаартысканан, видеонан дьүһүйүүгэ куонкурус, «Саха Моржи» кулууп чилиэннэрин сөтүөтэ, «Кыһыҥҥы остуоруйа» мультимедийнэй бырайыак, араас тиэмэлээх маастар-кылаастар, виртуальнай быыстапкалар уо.д.а. бааллар.
Бэстибээлгэ анаан Дьокуускайга Атласовтар уһаайбаларыгар, «Үрдэл» сынньалаҥ пааркатыгар уонна 202-с микро-оройуоҥҥа «муус куораттары» оҥоруохтара.
Итиэннэ үгэс быһыытынан, ахсынньы 1 күнүгэр өрөспүүбүлүкэ сүрүн болуоссаттарыгар Саҥа дьыллааҕы харыйа уота сандаарыччы тыгыаҕа.
Бэстибээл бырагырааматын кытта манна билсиҥ.