Кыһын саһыгыраччы күлүөххэ

Бөлөххө киир:

Истиҥ мичээр уонна 5-10 мүнүүтэҕэ иэйэн-куойан саһыгыраччы күлүү 30 мүнүүтэлээх сынньалаҥҥа тэннээх дииллэр. Күннээҕи түбүктэн быыс булан, маннык күлүү күүһү-уоҕу эбэрин, сэргэхсийэн күнү быһа чэбдик туруктаах сылдьыахха сөбүн учуонайдар дакаастаан тураллар.


Биллэн турар, маннык турукка чысхаан тымныылаах сиргэ олорор дьон ордук наадыйар. Уһун кэмнээх кыстыкка чэгиэн-чэбдик туруктаах киирэрбит туһугар, Өксөкүлээх Өлөксөй аатынан Норуоттар доҕордоһууларын киинэ кыһыҥҥы күллэринньиги тэрийэр.
Ол курдук, ахсынньы ый 6 күнүгэр куорат олохтоохторун уонна ыалдьыттарын «Кыһыҥҥы күллэринньиккэ” өрөспүүбүлүкэ улуустарын көрдөөхтөрүн көр-күлүү дьоро киэһэлэригэр ыҥыраллар. Кыһыҥҥы көргө-күлүүгэ кытталлар: «Дьиикимдэ дьээбэлэрэ” көр-күлүү норуот тыйаатыра (Горнай улууһа), Иван Новиков (Нам), Пантелеймон Степанов (Дьокуускай к.), Светлана Сергеева-Гоголева «Догдоҥо бэтиэхэлэрэ” (Мэҥэ Хаҥалас), «Кымньыы» сатира бөлөҕө, «Тэбэнэттэр», «Бээди бэтиэхэлэрэ” көр-күлүү бөлөҕө (Уус Алдан), Екатерина Новикова, Иннокентий Птицын (Дьокуускай к.), «Таансы-маансы” көр-күлүү бөлөҕө (Баатаҕай), уо.д.а.
Норуоттар доҕордоһууларын киинэ кыһыҥҥы кэмҥэ маннык холбоһуктаах көр-күлүү кэнсиэрин аан бастаан ыытар. Бу иннинэ “Күһүҥҥү киһи күлбүтүнэн”, “Сааскы мичээрдэр” уо.д.а. араас ааттаах күрэстэр элбэхтик ыытыллыбыттара.

Надежда ЕГОРОВА, “Саха сирэ” хаһыат, edersaas.ru 

+1
0
+1
0
+1
0
+1
0
+1
0
+1
0
+1
0