СӨ Үөрэх, наука министиэристибэтэ уонна «ЯТЭК» ПАУо Кыһыл Сыыр оскуолатын сайыннарарга ылсаллар.
Өрүттэр Кыһыл Сыыр орто оскуолатын материальнай-тэхиньиичэскэй баазатын тупсарарга, анал үөрэтэр бырагыраамалары оҥорсорго, үөрэнээччилэр идэлэрин талалларыгар көмөнү оҥорорго, социальнай көмүскэлэ суох нэһилиэнньэ араҥатын оҕолоро социальнай адаптацияны уонна реабилитацияны ааһалларыгар өйөбүл буоларга бэлэмнэрин биллэрдилэр.
—Өрөспүүбүлүкэ салалтатын кытары биһиги бу иннинэ Кыһыл Сыыр бөһүөлэгин сайыннарыы бырагырааматын оҥорсон бэлэмнээбиппит. Билигин, үөрэҕи сайыннарыыга туһуламмыт тэрээһиннэри олоххо киллэриигэ быһаччы ылсыбытынан барабыт. Оскуолаҕа үп-харчы уонна тэрийии өттүнэн көмөбүт эдэр ыччат дьоҕурун сайыннарарыгар, талаанын арыйарыгар тирэх буоларыгар, ыччат инникитин төрөөбүт-үөскээбит тапталлаах Бүлүүтүн туһугар күүһүн-күдэҕин ууран үлэлииригэр эрэли саҕар, — диэбит ЯТЭК ПАУо генеральнай дириэктэрэ Андрей Коробов.
Михаил Сивцев үөрэх — экономика сайдыытын бигэ акылаата буоларын бэлиэтиир. «Оҕолорго маннык усулуобуйаны тэрийэр партнердарбытыгар махтанабыт. Үөрэх кыһаларыттан хайдах каадырдар иитиллэн-такайылан тахсаллар да, өрөспүүбүлүкэбит, дойдубут эмиэ оннук сайдар. Маны таһынан, төһө да ыраах нэһилиэнньэлээх пууннарга олорбуттарын иһин, оҕолорго барыларыгар хаачыстыбалаах үөрэх тэриллиитин хааччыйыахтаахпыт. Бүгүн биһиги дьоһун суолталаах хардыыны оҥордубут», — диэтэ.
Улуус баһылыгын бастакы солбуйааччы Иван Евсеев: «Улууспут оҕолоро билиилэрин-көрүүлэрин хаҥаталларыгар кыах бэрилиннэ. Сотору кэминэн, бииргэ үлэлээһин үчүгэй түмүктэри көрдөрөрүгэр эрэнэбит», — диэн эттэ.
Сүрүн хампаанньа оскуолаҕа тэхиньиичэскэй кылаастары элбэтэр, үөрэнээччилэри факультативтарынан хааччыйар, оскуоланы бүтэрээччилэр үрдүк уонна орто анал үөрэххэ туттарсалларыгар бэлэмниир, научнай чинчийиилэргэ үөрэнээччилэри өйүүр былааннаах.
Мария Васильева (СИА) хаартыскаҕа түһэриилэрэ