Бүгүн, ахсынньы 15 күнүгэр, Нам улууһун Кыһыл Сыыр нэһилиэгэр «2019-2025 сылларга хаарбах дьиэттэн көһөрүү» бырагыраама чэрчитинэн тутуллубут икки элбэх кыбартыыралаах дьиэ арылынна. Саҥа кыбартыыраларга 28 ыал олохсуйда, ол эбэтэр 64 киһи дьиэлэннэ.
edersaas.ru
Саха сирин Бырабыыталыстыбатын Бэрэссэдээтэлин бастакы солбуйааччы Кирилл Бычков саҥа дьиэлээхтэри эҕэрдэлээтэ уонна бу үлэ иккис түһүмэҕин ситиһиилээхтик олоххо киллэрии салҕанан бара турарын, өссө сэттэ маннык дьиэ тутуллара күүтүллэрин бэлиэтээтэ. Оттон Саҥа дьыл чугаһына Нам сэлиэнньэтигэр өссө үс дьиэ тутуллан үлэҕэ киириэҕэ. Бастакы вице-премьер итини тэҥэ бу бырагыраама олоххо киирэрин туһугар үлэлээбит дьоҥҥо, ол иһигэр оройуон дьаһалтатын уонна «Прогресс» ХЭО тутааччыларыгар барҕа махталын биллэрдэ.
Кирилл Бычков бүгүҥҥү күҥҥэ Саха сиригэр Арассыыйа эрэгийиэннэрин ортотугар хаарбах дьиэлэртэн көһөрүү күргүөмнээхтик үлэтэ ыытылла турарын уонна күн-дьыл усулуобуйата, пандемия мэһэйэ баарын да үрдүнэн, үлэ барыта болдьоҕор түмүктэнэ турарын бэлиэтээтэ.
Тутуу миниистирэ Павел Кылатчанов саахалланар туруктаах дьиэни билиниигэр, сир учаастактарын бэлэмнээһиҥҥэ улахан үлэ ыытыллыбытын эттэ, онно үлэлээбит тутуу үлэһиттэригэр махталын тиэртэ.
Манна эбэн эттэххэ, Кыһыл Сыырга «2019-2025 сылларга хаарбах дьиэттэн көһөрүү» бырагыраама олоххо киирэр тиһэх түһүмэҕэр 1 418,90 кв. м. иэннээх сэттэ элбэх кыбартыыралаах дьиэ киллэриллибитэ, онно 92 олохтоох дьон олорор.
«Саха сирэ» хаһыат, edersaas.ru