Быйылгы үөрэх дьыла хаһааҥҥытааҕар даҕаны уратылаахтык ааһан эрэр. Биир кэлим эксээмэн араспысаанньата тахсан, оҕолор, төрөппүттэр син уоскуйа быһыытыйдылар. Оттон мэтээлгэ киирсэр оҕолор хайыылларый?
РФ үөрэҕириигэ миниистирэ Сергей Кравцов үгүс ыйытыы киирэр буолан, сонуну киэҥник тарҕатар сириэстибэлэргэ элбэхтик тахсар буолла. Быйыл 9-с кылаастар эксээмэнтэн олоччу босхолоннулар, 11-с кылааһы бүтэрээччилэртэн үрдүк үөрэххэ туттарсааччылар эрэ биир кэлим эксээмэни туттараллар. Оттон мэтээлгэ суоттаммыттар хайдах буолабыт диэн үгүс оҕо, төрөппүт, оннооҕор учууталлар мунаараллар. Миниистир бэҕэһээҥҥи РГ интервьютун кэмигэр: «Биир кэлим эксээмэни (ЕГЭ) үрдүк үөрэххэ туттарсар оҕолор эрэ туттаралларын учуоттаан, маннык быһаарыы ылылынна. Өскөтүн оҕо оскуолаҕа туйгун сыанаҕа үөрэммит буоллаҕына, биир кэлим эксээмэн түмүгэ суох туйгун сыаналаах аттестаты уонна мэтээли биэрэргэ», — диэн тустаах боппуруоска хоруйдаата. Санатан эттэххэ, урукку сылларга бу ньыманан бэриллэрэ, эксээмэн баала көрүллүбэт этэ. Икки сылтан бэттэх биир кэлим эксээмэҥҥэ (ЕГЭ) 70 баалтан кыраны ылыа суохтаах диэн ирдэбил киирбитэ. Оччотугар туйгун сыаналаах, мэтээллээх оҕолор үксүүһүлэр.
Людмила ПОПОВА, “Саха сирэ” хаһыат, edersaas.ru
Хаартыска: СеверПРЕСС.